Eki adamnyń óliminen keıin emshara kabınetterine tekseris bastaldy — DSM

ASTANA. KAZINFORM — Densaýlyq saqtaý mınıstrligi Jeke emshara kabınetterinde kórsetiletin medıtsınalyq qyzmetterdiń sapasy men qaýipsizdigin baqylaýdy kúsheıtedi, dep habarlaıdy vedomstvonyń baspasóz qyzmeti.

Mınıstrlik bıylǵy jyldyń basynan beri Jambyl oblysynda medıtsınalyq kómek kórsetý standarttaryn buzǵan medıtsınalyq uıymdarda eki adam qaıtys bolǵanyn eske saldy.

DSM Medıtsınalyq jáne farmatsevtıkalyq baqylaý komıteti osy mekemelerdi tekserý kezinde eleýli buzýshylyqtardy, onyń ishinde shuǵyl medıtsınalyq kómek kórsetý úshin lıtsenzııalar men sharttardyń joqtyǵyn, dári-dármekterdi saqtaý qaǵıdalaryn saqtamaýdy anyqtady. Óńirde qoǵamdyq monıtorıngtik toptar quryldy. Júrgizilgen tekserýlerden keıin olar medıtsınalyq kómek kórsetý standarttaryn buzatyn 133 emshara kabınetin anyqtady.

— Jospardan tys tekserýlerdiń nátıjesinde 14 emshara kabınetine jalpy somasy 2,1 mln teńgege ákimshilik aıyppul salyndy, 51 kabınet óz erkimen jumysyn toqtatty, 68 mekemede tekserýler jalǵasyp jatyr, — dep habarlady MFBK Jambyl oblysy boıynsha departamentinde.

Osyǵan uqsas jumys Qazaqstannyń basqa óńirlerinde de júrgiziletin bolady.

Jospardan tys tekserýler azamattardyń resmı ótinishteri, ákimdikterdiń, Densaýlyq saqtaý basqarmalarynyń, quqyq qorǵaý organdarynyń tapsyrmalarynyń negizinde ǵana júrgizilýi múmkin ekenin aıta ketken jón.

Densaýlyq saqtaý mınıstrligi tek lıtsenzııalanǵan medıtsınalyq uıymdarǵa júginýdi, personaldyń biliktiligine jáne medıtsınalyq qyzmetti júzege asyrýǵa lıtsenzııanyń bolýyna qyzyǵýshylyq tanytýdy, dárigerlik baqylaýsyz úıde emsharalar júrgizbeýdi usynady.

Buǵan deıin Qazaqstanda júkti áıelderdiń 90% prenataldyq skrınıngpen qamtylǵany habarlandy.