Eki adamnyń qazasynan keıin Astanadaǵy qurylys nysandary qatań tekseriledi

Qazaqstan Respýblıkasy Eńbek jáne halyqty áleýmettik qorǵaý mınıstrligi Astanadaǵy qurylys nysandarynda eńbek qaýipsizdigi talaptarynyń saqtalýyna baqylaýdy kúsheıtedi. Mundaı sheshim memlekettik organdar men qurylys salasynyń ókilderi qatysqan keńestiń qorytyndysy boıynsha qabyldandy.

Elordada munaraly krandardyń qulaýyna baılanysty eki jazataıym oqıǵa oryn alǵan bolatyn. Sonyń saldarynan eki adam qaza taýyp, taǵy eki adam aýyr jaraqat aldy. Árbir oqıǵa boıynsha arnaıy tergeý júrgizilip jatyr.

Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev qurylys nysandaryndaǵy qaýipsizdik máselesi buǵan deıin de birneshe ret kóterilgenin atap ótti. Sala ókilderine eńbek qaýipsizdigi talaptaryna formaldy qaraýǵa bolmaıtyny eskertilip, anyqtalǵan olqylyqtardy joıýǵa ýaqyt berilgen.

— Biz qurylys kompanııalaryna profılaktıkalyq jumystar júrgizdik, eskertý jasadyq, anyqtalǵan buzýshylyqtardy joıýǵa ýaqyt berdik. Soǵan qaramastan qaýipsizdik talaptaryn elemegender jaýapkershilikten jaltara almaıdy, — dep málimdedi Erbol Tuıaqbaev.

Keńes qorytyndysy boıynsha Memlekettik eńbek ınspektsııasy komıtetine zańnamada belgilengen tártippen qurylys nysandarynda jospardan tys tekserýler júrgizý máselesin qaraý tapsyryldy. Talaptardyń saqtalmaýy anyqtalǵan jaǵdaıda materıaldar tıisti memlekettik organdarǵa joldanyp, zańda kózdelgen sharalar qabyldanady.

Sondaı-aq jazataıym oqıǵalar men kemshilikter qaıtalanatyn uıymdardyń jumysy jeke taldanbaq. Inspektorlar buǵan deıingi tergeý nátıjesinde anyqtalǵan sebepter men buzýshylyqtardyń qanshalyqty tolyq joıylǵanyn teksermek.

— Eger jazataıym oqıǵa oryn alyp, tergeý júrgizilip, tıisti nusqama berilse, anyqtalǵan buzýshylyqtar joıyldy delingenimen, keıin taǵy da qaıǵyly jaǵdaı oryn alsa, bul qurylys kompanııalarynyń birinshi basshylaryna qatysty zańdy suraq týyndaıdy. Jazataıym oqıǵanyń qaıta oryn alýy — qaýipsizdik talaptaryn qamtamasyz etýde sheshilmegen júıeli máselelerdiń bar ekenin kórsetedi, — dep atap ótti birinshi vıtse-mınıstr.

Erbol Tuıaqbaev óndiristegi oqıǵalardy únemi «adamı faktor» degen bir ǵana sebeppen túsindirýge bolmaıtynyn aıtty. Eger jumysshy qatelik jiberse, onyń nelikten qateleskenin anyqtaý qajet. Ol tıisti deńgeıde oqytyldy ma? Qural-jabdyq jaramdy boldy ma? Baqylaý durys uıymdastyryldy ma? Tehnologııalyq talaptar saqtaldy ma? Osy máselelerdiń barlyǵy jan-jaqty qaralýy kerek.

— Keıde «adamı faktorǵa» baılanysty dep otyrǵanymyzdyń artynda basqarý máselesi turady, — dedi ol.

Talaptardy júıeli túrde buzatyn uıymdarǵa erekshe nazar aýdarylady. Mundaı kompanııalarǵa qatysty qatań sharalar qoldaný usynyldy. Onyń ishinde qurylys qyzmetine berilgen lıtsenzııany ýaqytsha toqtatý nemese qaıtaryp alý máselesi de zańnamaǵa sáıkes qaralýy múmkin.

Birinshi vıtse-mınıstr qurylys nysanyndaǵy qaýipsizdikke eń aldymen uıym basshysy jaýapty ekenin qadap aıtty.

— Qurylys kompanııasynyń basshysy nysannyń qansha paıyzy oryndalǵanyn, ony tapsyrý merzimderi men qarjylyq kórsetkishterdi ǵana bilip qoımaýy kerek. Ol búgin qurylys alańynda qandaı qaýip-qaterler bar ekenin jáne onda jumys isteıtin árbir adamnyń aman-esen úıine oralýy úshin qandaı sharalar qabyldanyp jatqanyn qadaǵalaýǵa tıis, — dep málimdedi Erbol Tuıaqbaev.

Eńbek mınıstrliginde eńbek jaǵdaılarynyń qaýipsizdigin qamtamasyz etý formaldy talap nemese qosymsha shyǵyn retinde qarastyrylmaýy kerek ekeni aıtyldy. Jumysshylardyń ómiri men densaýlyǵyna qaýip tóngen jaǵdaıda memleket tarapynan kózdelgen baqylaý ári tıisti sharalar tolyq kólemde qoldanylýy qajet.

Eske sala keteıik, Astanada salynyp jatqan nysan aýmaǵyna munaraly kran qulap, bir adam mert bolǵanyn jazdyq.

Oǵan deıin SQO-da kran-manıpýlıatordyń júrgizýshisi jumys ornynda mert boldy.