Eki adam Qostanaı oblysyndaǵy Tobyl ózenine aǵyp ketti
ASTANA. KAZINFORM — 14 maýsym kúni Qostanaı aýdanyna qarasty Altyn Dala aýyly mańyndaǵy Tobyl ózeninde qaıǵyly oqıǵa boldy. Shomylýǵa tyıym salynǵan aýmaqta eki adam sýǵa batyp ketti. Olardyń biri – 2020 jyly týǵan bala, dep jazdy óńirdegi menshikti tilshi.
Aldyn ala málimet boıynsha, otbasy ózen jaǵasynda demalyp júrgen. Oıyn kezinde bala qatty aǵys aımaǵyna túsip ketken. Muny baıqaǵan atasy nemeresin qutqarýǵa umtylǵanymen, ekpindi sý aǵyny ekeýin de alyp ketken.
Oqıǵa ornyna Qostanaı oblystyq Tótenshe jaǵdaılar departamentiniń qyzmetkerleri, polıtsııa qyzmetkerleri, jedel járdem brıgadasy jáne jergilikti atqarýshy organ ókilderi dereý jetti.
Іzdestirý-qutqarý jumystaryna 40-qa jýyq maman, 13 tehnıka, eki júzý quraly jáne ushqyshsyz ushý apparaty jumyldyryldy.
Іzdeý jumystary bastalǵaly beri shamamen 32 myń sharshy metr sý aıdyny tekserildi. Qazirgi ýaqytta úsh súńgýirler toby izdestirý jumystaryn júrgizip jatyr.
Qutqarý-izdestirý sharalary áli de jalǵasyp jatyr.
Qostanaı oblysynyń Tótenshe jaǵdaılar departamenti turǵyndardy sý aıdyndaryndaǵy qaýipsizdik erejelerin qatań saqtaýǵa, balalardy qaraýsyz qaldyrmaýǵa jáne shomylýǵa arnalmaǵan, tyıym salynǵan jerlerde sýǵa túspeýge shaqyrdy.
Sondaı-aq qutqarýshylar qaıyqpen júrgende nemese sý mańynda bolǵan kezde qutqarý keýdeshelerin paıdalanýdyń mańyzdylyǵyn eske saldy.
Eske salaıyq, buǵan deıin Batys Qazaqstan oblysynda ózenge úsh jasóspirim batyp ketken bolatyn.
