Eki adam batyp ketken Saıran kóline qorshaý ornatyldy
ALMATY. KAZINFORM – 25 maýsym kúni Almaty qalasyndaǵy Saıran kóline jasóspirim men eresek er adam batyp ketti. Qaıǵyly jaǵdaıdan keıin sý aıdynynyń aınalasyna metall qorshaýlar ornatyldy.
Kazinform agenttiginiń fototilshisi kólge baryp, ondaǵy qazirgi jaǵdaıdy kórip qaıtty. Sý qoımasynyń mańyna «Shomylýǵa tyıym salynady» degen eskertý jazýlary bar temir qorshaýlar qoıylyp jatyr.
Kól mańynda polıtsııa qyzmetkerleri kezekshilik atqaryp jatyr, sýǵa kirýge ýaqytsha tyıym salynǵan. Qaýipsizdikti qamtamasyz etý úshin qutqarý qaıyqtary jetkizildi.
Sondaı-aq abattandyrý jumystary jalǵasyp jatyr. Oǵan qaramastan, qalalyqtar men qonaqtar kól mańynda serýendep júr.
Eske salaıyq, kúni keshe Saıran kólinde qaıǵyly jaǵdaı boldy. Respýblıkalyq jedel-qutqarý jasaǵynyń súńgýirleri sýdan eki adamnyń denesin alyp shyqty. Aldymen 17 jastaǵy jasóspirimniń denesi tabylsa, keıin 1977 jyly týǵan er adam sýdan shyǵaryldy.
Jaqynda Almaty ákimi Darhan Satybaldy apparat keńesiniń otyrysynda Saıran kóliniń sanıtarııa jaǵdaıyna erekshe nazar aýdaryp, quqyqbuzýshylarǵa baqylaý júrgizip, qatań shara qoldanbaǵan basqarmalardy qatań synǵa alǵan bolatyn.
Osyǵan deıin Saıran kólinde abattandyrý jumystary aıaqtalmaı jatyp, tazalyq máselesi týyndaǵany týraly jazǵanbyz.