EYDU Qazaqstannyń statıstıkalyq júıesiniń joǵary sapasyn rastady
ASTANA. KAZINFORM – Ekonomıkalyq yntymaqtastyq jáne damý uıymy (EYDU) Qazaqstannyń Tıisti statıstıkalyq praktıka jónindegi usynymǵa qosylǵanyn resmı túrde rastady, dep habarlaıdy Ulttyq statıstıka bıýrosy.
Bul – EYDU-nyń statıstıka salasyndaǵy alǵashqy quqyqtyq qujaty jáne Qazaqstan TMD óńirindegi osy qujatqa qosylǵan alǵashqy el atandy.
Ekonomıkalyq yntymaqtastyq jáne damý uıymy (EYDU) Qazaqstannyń Tıisti statıstıkalyq praktıka jónindegi usynymǵa qosylǵanyn resmı túrde rastady. Bul – EYDU-nyń statıstıka salasyndaǵy alǵashqy quqyqtyq qujaty jáne Qazaqstan TMD óńirindegi osy qujatqa qosylǵan alǵashqy el atandy.
Atalǵan usynym – resmı statıstıkanyń táýelsizdigin, obektıvtiligin, ashyqtyǵy men sapasyn qamtamasyz etýge baǵyttalǵan 12 qaǵıdatty qamtıtyn halyqaralyq standart. Oǵan qosylý – Qazaqstannyń ulttyq statıstıkalyq júıesi EYDU-nyń negizgi talaptaryna saı keletinin jáne úzdik halyqaralyq tájirıbege sáıkes damyp jatqanyn bildiredi.
EYDU sheshimi 2023–2025 jyldarǵa arnalǵan Qazaqstannyń ulttyq statıstıkalyq júıesine júrgizilgen jan-jaqty sholý nátıjesinde qabyldandy. Qujatta statıstıkany tsıfrlandyrý, zamanaýı ádisnamalardy engizý jáne paıdalanýshylardyń derekterge degen senimin arttyrý baǵytynda eldiń qol jetkizgen nátıjeleri atap ótilgen.
– Bul – Qazaqstannyń statıstıkalyq júıesine berilgen mańyzdy baǵa. Ol resýrstardyń jetkiliktiligi, qupııalylyqty saqtaý, turaqty quqyqtyq jáne ınstıtýtsıonaldyq negizdiń bolýy, sondaı-aq jańa jáne balamaly derekkózderdi paıdalaný sııaqty talaptarǵa saı keletinin rastaıdy. Qujatta statıstıka sapasynyń taldaý men basqarýshylyq sheshimderdiń sapasyna tikeleı áser etetini atap kórsetilgen. Biz osy mejeni saqtap qalýǵa jáne odan ári jetildire berýge nıettimiz, - dedi QR Strategııalyq josparlaý jáne reformalar agenttigi Ulttyq statıstıka bıýrosynyń basshysy Maqsat Turlybaev.
EYDU Bas hatshysy Matıas Kormann yntymaqtastyqty jalǵastyryp, Qazaqstanda joǵary sapaly statıstıkalyq júıeni damytýdy qoldaýǵa nıetti ekenin jetkizdi.
Aıta keteıik, Qazaqstannyń atalǵan usynymǵa qosylý jumysy QR Syrtqy ister mınıstrliginiń qoldaýymen júzege asyryldy.
Buǵan deıin mınıstrliktiń týrızm salasyna arnalǵan tsıfrlyq statıstıka júıesin engizýdi josparlap otyrǵanyn jazǵan edik.