«Eho» QB 26 aımaqtyq birlestikpen birge saılaýǵa keshendi baqylaý júrgizedi
ALMATY. QazAqparat - Saılaý protsesin baqylaýshylar zańbuzýshylyqtardyń fotosy men vıdeosyn onlaın rejimde áleýmettik jelige salatyn bolady. Bul týraly búgin Almatyda ótken baspasóz máslıhaty barysynda «Eho» qoǵamdyq birlestiginiń dırektory Pavel Lobachev aıtty.
Aıta ketý kerek, «Eho» qoǵamdyq birlestigi 26 aımaqtyq qoǵamdyq birlestiktermen birlese otyryp ótetin saılaýǵa keshendi baqylaý júrgizbek. Osy baǵytta atalǵan birlestik Eýropa demokratııalyq qorynyń grantyn jeńip alǵan.
Saılaý protsesin baqylaý uzaq merzimdi (saılaý aldyndaǵy jáne saılaýdan keıingi kezeńder) jáne qysqa merzimdi (daýys berý barysy men daýysty sanaý protsesterin baqylaý) bolmaq.
«Bizdiń negizgi mindetimiz - saılaý zańnamalarynyń kóp burmalanatyn osal jerlerin anyqtaý, saılaý protsesine táýelsiz baǵa berý, saılaý nátıjeleri boıynsha QR zańnamalaryna ózgeris engizý úshin dáıekti usynys keltirý, zertteý jumystary, trendterdi anyqtaý, statıstıka derekterin taldaý bolyp tabylady», - dedi «Eho» qoǵamdyq birlestiginiń dırektory Pavel Lobachev.
Onyń aıtýynsha, uzaq merzimdi baqylaý jumysy 14 oblys ortalyǵy men Almaty, Astana qalalarynda júrgizilmek.
Qysqa merzimdi baqylaý barysynda barlyq oblys ortalyqtarynda, Astana men Almatyda, jáne elimizdiń 10 kishi qalalarynda 84 mobıldi jergilikti baqylaýshylar jumys isteıtin bolady.
Bul jobanyń erekshe jańalyǵy baqylaýshylar onlaın rejimde zańbuzýshylyqtardy foto men vıdeoǵa túsirip, áleýmettik jelilerge salatyn bolady.
