«Eho-býmerler» Ońtústik Koreıada týý kórsetkishiniń rekordtyq ósimine yqpal etti

ASTANA. KAZINFORM – 2025 jyly Ońtústik Koreıada 254 500 náreste dúnıege keldi, bul sońǵy 15 jyldaǵy eń úlken jyldyq ósim boldy, dep habarlaıdy Kazinform.

Bul ósim negizinen 1991 jáne 1995 jyldar aralyǵynda týǵan jáne qazir reprodýktıvti jastyń eń joǵary deńgeıine jetken «eho-býmerler» dep tanymal urpaq sanynyń ýaqytsha ósýine baılanysty, dep habarlaıdy The Guardian gazeti Ońtústik Koreıanyń Statıstıka mınıstrligine silteme jasaı otyryp.

Úkimet otbasyn josparlaý saıasatyn is júzinde toqtatqannan keıin týý kórsetkishi qysqa merzimge ósken 1991 jáne 1995 jyldar aralyǵynda shamamen 3,6 mln bala dúnıege keldi.

Bul áıelder toby qazirgi ýaqytta týý kórsetkishi eń joǵary otyz jas shamasynda. Baǵalaý boıynsha, 2025 jyly otyz jas shamasyndaǵy áıelder sany 1,7 mln adamdy quraǵan, bul 2020 jylmen salystyrǵanda 9%-ǵa kóp.

Alaıda demograftar bul ýaqytsha ósim 1996 jyldan keıin týǵan sany azyraq urpaqtyń otyz jasqa jete bastaǵan 2027 jyldan bastap tómendeı túsýi múmkin ekenin eskertip otyr.

Aıta ketý kerek, Ońtústik Koreıa EYDU elderi arasynda týý kórsetkishi 1,0-den tómen jalǵyz el bolyp qalyp otyr.

Bılik jıyrma jyl ishinde bosanýdy qoldaý sharalaryna júzdegen mıllıard dollar jumsady, sonyń ishinde mol aqshalaı tólemder, turǵyn úı sýbsıdııalary, ata-ana demalysyn uzartý jáne bala kútimine qoldaý kórsetý bar. Qazir keıbir korporatsııalar árbir bosaný úshin 100 mln vonǵa deıin (shamamen 70 myń dollar) usynyp otyr.

Alaıda sarapshylar bılik organdary sheshýge qınalyp otyrǵan qurylymdyq kedergiler retinde turǵyn úı baǵalarynyń únemi joǵary bolýyn, jeke bilim alý shyǵyndarynyń tez ósýin, jumys ornyndaǵy ata-analardyń stıgmatızatsııasy jáne jastar arasynda eńbek naryǵynyń qurylymdyq kedergiler saldarynan toqyraýyn atap ótti.

Osyǵan deıin Ońtústik Koreıa prezıdenti týý kórsetkishin arttyrýdyń tıimdi tásilin usynǵanyn jazǵan bolatynbyz.