Egizbaev: Úkimet fermerlerge 285 mlrd teńge qaryzyn bıyl óteıtindigine senemiz

ASTANA. KAZINFORM – Fermerlerge memleket tarapynan 285 mlrd teńge qaryz qalyp otyr. Bul týraly Parlament palatalarynyń birlesken otyrysynda Májilis depýtaty Serik Egizbaev aıtty.

- 2024 jyly agroónerkásip keshenin damytýǵa 575 mlrd teńge bólinse, onyń tek 86 paıyzy ǵana ıgerilgen. Al sońǵy bes jylda aýyl sharýashylyǵyn sýbsıdııalaýǵa 2,2 trln teńge bólingenimen Joǵary aýdıtorlyq palatanyń esebinde 142 mlrd teńgeniń maqsatsyz jumsalǵany anyqtalǵan. Bul qarjynyń tıimdiligin baǵalaıtyn naqty júıeniń áli de qalyptaspaǵanyn kórsetedi, - dedi ol.

Májilis depýtatynyń dereginshe, aýyl sharýashylyǵy — eń tómen jalaqy tólenetin sala bolyp otyr. Ortasha aılyq jalaqy — 262 myń teńge, al resmı tirkelgen qyzmetkerler sany bar bolǵany 1,6 paıyz. Bul – aýylda kóleńkeli jáne maýsymdyq jumystyń keń taralǵanyn, áleýmettik qorǵalmaý men bolashaq zeınetaqynyń joqtyǵyn kórsetedi. Memlekettik qoldaý tek tehnıka men sýbsıdııaǵa emes, eń aldymen — aýyl turǵynyna baǵyttalýy qajet.

- Jumyssyzdyq pen ınfraqurylymnyń jetispeýi saldarynan 2024 jyly 6,7 myńnan astam adam aýyldan kóship ketken. Joǵary aýdıtorlyq palata bul úrdisti naqty atap ótken. Mıkrokredıt, jeńildetilgen nesıe – bul tek qural. Eger aýylda turaqty jumys, qoljetimdi baspana, mektep, medıtsınalyq pýnkt jáne mádenıet úıi bolmasa, bul baǵdarlamalar uzaqmerzimdi nátıje bere almaıdy. Sonymen qatar, fermerlerge memleket tarapynan 285 mlrd teńge qaryz qalyp otyr. Úkimet bul bereshekti jyl sońyna deıin tolyq óteýge ýáde berdi. «Aýyl» partııasynyń fraktsııasy, Agrarlyq máseleler Komıtetiniń depýtattary Úkimet bergen ýádesine turady dep senim bildiredi. Úkimetke kóktemgi dala jumystaryn júrgizýge jáne fermerlerge aınalym qarajatyn tolyqtyrýǵa jeńildikpen nesıeleýdiń oń tájirıbesin keńeıtýdi usynamyz. Osy oraıda, «Aýyl» partııasynyń fraktsııasy 5 paıyzdyq jeńildetilgen kredıtteýge kezeń-kezeńimen kóshýdi tolyq qoldaıdy, - dedi Májilis depýtaty.

Sóz sońynda Serik Egizbaev «Aýyl» partııasynyń fraktsııasy Úkimettiń jáne Joǵary aýdıtorlyq palatanyń ótken jylǵy respýblıkalyq bıýdjettiń atqarylýy týraly esebin negizinen qoldaıtynyn aıtty.

Aıta keteıik, Úkimet úıinde Parlament palatalarynyń birlesken otyrysy ótip jatyr.