Egistikti kıikterden qorǵaý: tórt oblysta qosymsha ınspektorlar alynady

ASTANA. KAZINFORM — Kıik sanyn retteý máselesi kóterilmeıdi. Bul týraly Ekologııa jáne tabıǵı resýrstar mınıstri Erlan Nysanbaev málim etti.

Búgin Senatta ekojúıeni utymdy paıdalaný taqyrybyndaǵy otyrysta depýtat Janbolat Jórgenbaev kıik jáne egis alqaptary máselesin kóterdi.

- Kıik popýlıatsııasyn retteý máselesi birneshe jyldan beri kún tártibinde tur. Onyń ekonomıkalyq ári áleýmettik aspektisi de óte mańyzdy. Atap aıtqanda, qazir kıiktiń popýlıatsııasy aýyl sharýashylyǵymen aınalysatyn fermerler men jergilikti turǵyndar úshin belgili bir qıyndyqtardy týdyryp otyr. Sondyqtan naqty sheshim qabyldaý kerek. Mınıstrlik kıik popýlıatsııasyn turaqty basqarý jáne ony tıimdi paıdalaný úshin qandaı naqty shara qabyldap jatyr?, - dep surady senator.

Óz kezeginde E. Nysanbaev 2021 jyldan beri Úkimettiń iske asyryp jatqan sharalarynyń arqasynda 4 mln-nan astam kıik bar ekenin aıtty. Osyǵan baılanysty ınspektorlar sany kóbeıtiledi.

- Kıik sany ósken saıyn, kıiktiń jaıylýy turǵysynda biraz másele paıda boldy. Ásirese, Batys Qazaqstan oblysyndaǵy egis alqaptaryn qorǵaýǵa ekpin qoıdyq. Bıyl mamandar sanyn kóbeıtip, Batys Qazaqstan, Aqmola, Qaraǵandy jáne Qostanaı oblystaryna qosymsha ınspektorlar alyp, aýyl sharýashalyǵy jerlerin qorǵaý jumystaryna nazar aýdaramyz. Bıyl kıik sanyn retteý máselesin kótermeımiz, tek egis alqaptaryn qorǵaýmen aınalysamyz, - dedi mınıstr.

Aıta keteıik, 2023 jyly el aýmaǵynda 42 myń bas kıik atyldy.

Memleket basshysynyń tapsyrmasyna sáıkes kıikterdi atýǵa tyıym salyndy.

Buǵan deıin Erlan Nysanbaev 2025 jyly kıik sany 4,5 mln bastan asatynyn aıtqan edi.

Sonymen qatar, eldegi egin aýmaqtaryn kıikterden qorǵaý úshin tıisti sharalar júrgiziledi.

Bul turǵyda Qazaqstan kıikterdi jazda kóshirý úshin Reseımen kelissóz júrgizip jatqany málim boldy.