Egistik sýarý: ońtústik óńirlerde 9,9 mlrd tekshe metr sý paıdalanyldy

ASTANA. KAZINFORM — Qazaqstannyń ońtústik oblystarynda egis alqaptaryn sýarýǵa josparlanǵan sý kóleminiń 98%-y alyndy, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.

Vegetatsııa kezeńi bastalǵannan beri Almaty, Jambyl, Qyzylorda, Túrkistan jáne Jetisý oblystarynda egis alqaptaryn sýarý úshin 9,9 mlrd tekshe metr sý alyndy. Josparlanǵan kólem 10,1 mlrd tekshe metr. Vegetatsııa kezeńiniń sońyna deıin qalǵan 200 mln tekshe metr sý alynady.

Qazir Almaty oblysynda 1,2 mlrd tekshe metr sý alynyp, 136 myń gektar egistik sýaryldy. Al Jetisý oblysynda 1 mlrd tekshe metr sý alynyp, 132 myń gektar jer sýaryldy. Jambyl oblysynda Tasótkel sý qoımasynan, Shý jáne Talas ózenderinen alynǵan sý kólemi 897 mln tekshe metr boldy. Óńirde 70 myń gektar egistik jer sýaryldy. Qyzylorda oblysy alǵan sý kólemi — 3,476 mlrd tekshe metr. Óńirde kestege sáıkes kúrishtiń masaqtaný kezeńi ótip jatyr. Túrkistan oblysyna 3,27 mlrd tekshe metr sý berildi. Búgingi tańda Shardara aýdanynda negizgi daqyldardy sýarý aıaqtaldy. Maqtaaral jáne Jetisaı aýdandarynda 111,4 myń gektar jer sýaryldy. Qazaqstannyń basqa óńirlerinde jalpy kólemi 327 mln tekshe metr sý alyndy.

— Qazaqstanda sýarý maýsymy aıaqtalýǵa jaqyn. Mınıstrlik qabyldaǵan sharalar vegetatsııa kezeńiniń qalǵan bóligin turaqty ótkizýge múmkindik berip otyr. Eldiń ońtústiginde kanaldar arqyly sýdy kezekpen berý kesteleri bekitildi, sorǵy qondyrǵylary men tik drenaj júıeleri qosyldy, sondaı-aq sý sharýashylyǵy jaǵdaıyna turaqty monıtorıng júrgizilip, kollektorlyq-drenajdyq sý qaıtalama paıdalanylyp jatyr, — dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.

Osydan buryn Sý resýrstary mınıstrligi 29 gıdrotehnıkalyq nysanǵa kópfaktorly zertteý júrgizip jatqany málim boldy.