Egiske daıyndyq: 6 myń sharýaǵa 385 mlrd teńgedeı jeńildetilgen nesıe berildi

ASTANA. KAZINFORM — Búgingi tańda kóktemgi dala jumystaryna daıyndyq aıasynda 6,1 myń sharýaǵa 384,8 mlrd teńge jeńildetilgen nesıe berildi.

Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.

— Egis jumystaryn erte qarjylandyrýdyń arqasynda, sharýalar negizgi resýrstardy, ıaǵnı tuqym, tyńaıtqysh, janar-jaǵarmaı men aýyl sharýashylyǵy tehnıkasyn qolaıly baǵamen alyp úlgerdi. Búgingi kúni kóktemgi dala jumystaryn qarjylandyrýǵa 480,6 mlrd teńge somasyna 7 myń ótinim kelip tústi, onyń 384,8 mlrd teńgesine 6,1 myń sharýa qarjylandyryldy, — dedi ol kóktemgi dala jumystary jaıly baıandamasynda.

Sondaı-aq mınıstr sharýalar jeńildetilgen nesıeni 8 kózden ala alatynyn atap ótti. 

— Sharýalardy jeńildikpen qarjylandyrýǵa 8 áleýmettik-kásipkerlik korporatsııa qatysýda (Aqmola, Aqtóbe, Almaty, BQO, Qostanaı, Qyzylorda, Pavlodar, SQO), olarǵa fermerlerdi qarjylandyrý úshin 131,1 mlrd teńge bólindi. Olardyń ishinde Aqmola, Qostanaı jáne SQO jeńildetilgen qarajatty ıgerý boıynsha jaqsy kórsetkishter kórsetip jatyr, — dedi Aıdarbek Saparov.

Osyǵan deıin elimizde egis alqabynyń jalpy kólemi 23,7 mln gektarǵa jetkeni belgili boldy.

Sonymen qatar bıyl 580 myń tonnaǵa jýyq erte pisetin kókónis jınalatyny habarlandy.