Egis jumystaryn erte qarjylandyrýǵa 4800-den astam fermer qol jetkizdi

Memleket basshysynyń egis naýqanyn ýaqytyly ári sapaly ótkizý jónindegi tapsyrmasyn oryndaý maqsatynda ótinimderdi qabyldaý 2025 jylǵy 1 qazanda bastaldy. Aýyl sharýashylyǵy taýaryn óndirýshiler úshin túpkilikti syıaqy mólsherlemesi jyldyq 5% boldy.

Búginde jalpy somasy 630 mlrd teńge bolatyn 5 142 ótinimnen turatyn pýl qalyptastyrylyp, 4,8 myń aýyl sharýashylyǵy taýaryn óndirýshige 572 mlrd teńge kóleminde qarjy berildi, 6,8 mln gektardan astam egis alqaby qamtyldy.

Jalpy alǵanda, 2026 jyly kóktemgi egis jáne egin jınaý jumystaryn jeńildetilgen tártippen nesıeleýge 750 mlrd teńge baǵyttaý josparlanyp otyr. Qarajat alty arna arqyly bólinedi. Olar: «Agrarlyq nesıe korporatsııasy» aktsıonerlik qoǵamy arqyly tikeleı qarjylandyrý, ekinshi deńgeıli bankter, mıkroqarjy uıymdary, óńirlik ınvestıtsııalyq ortalyqtar, kredıttik seriktestikter jáne áleýmettik-kásipkerlik korporatsııalar.

Túpkilikti qaryz alýshylar úshin nesıe mólsherlemesin jyldyq 5%-ǵa deıin tómendetý maqsatynda «Agrarlyq nesıe korporatsııasy» oblıgatsııalary boıynsha kýpondyq syıaqyny sýbsıdııalaý tetigi qoldanylyp jatyr.

Sonymen qatar «Damý» kásipkerlikti damytý qory» arqyly nesıelerge kepildik berý jalǵasyp jatyr. Bul qaryz somasynyń 85%-yna deıin kepildikpen qamtýǵa múmkindik beredi.
Qazir jalpy qaryz somasy 216,7 mlrd teńge bolatyn 1 379 kepildik berildi.

Qarjylandyrýdyń erte bastalýy fermerlerge 2026 jylǵy egis naýqanyna aldyn ala daıyndalýǵa zor múmkindik týǵyzdy. Bólingen qarajat janar-jaǵarmaı materıaldaryn tıimdi baǵamen satyp alýǵa, mıneraldyq tyńaıtqyshtar alýǵa, aýyl sharýashylyǵy tehnıkasyn jóndeýge jáne qajetti tuqym qoryn qalyptastyrýǵa baǵyttalyp otyr.

Jeńildetilgen qarjylandyrý kóktemgi egis jumystaryn daıyndaý men júrgizýge ǵana emes, sondaı-aq egin jınaý naýqanyn ótkizýge jáne maýsymdyq shyǵyndardy jabýǵa da qoljetimdi bolmaq.

Eske sala keteıik, «Báıterek» UIH» AQ Basqarma tóraǵasy Rýstam Karagoıshın osy fermerlerge qarajat bólýge qatysty túsinik berdi.