Egis alqaptarynda drondardy keńinen paıdalaný kerek – Oljas Bektenov
ASTANA. KAZINFORM – Premer-mınıstr Oljas Bektenov Úkimet otyrysynda aýyl sharýashylyǵy ónimin shyqqan jerinen sońǵy tutynýshyǵa deıin jetkizýdiń ashyq tizbegin qurýdy tapsyrdy.
— Tsıfrlandyrý memlekettik qoldaý sharalarynyń ashyqtyǵy men tıimdiligin arttyrýǵa yqpal etýge tıis. Aýyl sharýashylyǵy jerlerin esepke alýda ІT-quraldardy engizý mańyzdy.
Tsıfrlandyrý alqaptar men jaıylymdyq jerlerdi utymdy paıdalanýǵa, egin egý jumystaryn tıimdi josparlaýǵa yqpal etýi qajet. Osyǵan oraı, barlyq aýyl sharýashylyǵy alqaptaryna ǵaryshtyq monıtorıngti keńinen qoldanyp, drondardy paıdalaný kerek, - dedi Úkimet basshysy.
Sondaı-aq ol yqtımal qýańshylyqtardy tsıfrlyq tehnologııalar kómegimen erte boljaý baǵytynda izdenisterdi kúsheıtý kerektigin aıtty.
— Ónimdi shyqqan jerinen sońǵy tutynýshyǵa deıin jetkizýdiń ashyq tizbegin qurý qajet. Bul júıe óndirilgen ónimdi esepke alýǵa, onyń sapasyna kepildik berýge, bıologııalyq jáne veterınarlyq qaýipsizdikti baqylaýǵa baǵyttalýǵa tıis.
Klımattyq táýekelderdi, astyqtyń túsimin jáne azyq-túlik ónimderiniń naryqtyq baǵasyn boljaý úshin tsıfrlyq sheshimder men jasandy ıntellektini keńinen qoldaný kerek. Jasandy ıntellektini qoldana otyryp, egindi sýarý, ósimdikterdi qorǵaý quraldary men tyńaıtqyshtardy qoldaný, jem-shóp tutyný, sondaı-aq aýyl sharýashylyǵy tehnıkalary parkin basqarý protsesterin ońtaılandyrý qajet, - dedi Oljas Bektenov.
Sonymen qatar búgin Energetıka mınıstrligi kóktemgi egis maýsymyna dızel baǵasyn usyndy.