eGov.kz portaly men onyń quramdas bólikterinde avtorızatsııalaý tártibi ózgerdi
ASTANA. KAZINFORM - Aqparattyq qaýipsizdikti qamtamasyz etý jáne paıdalanýshylardy qorǵaý maqsatynda osy jyldyń qazan aıynan bastap eGov.kz elektrondyq úkimet portaly men onyń quramdas bólikterinde (eOtinish servısi, «Ashyq úkimet» portaly) avtorızatsııalaý tártibi jańartyldy.
«UAT» AQ Korporatıvtik kommýnıkatsııalar departamenti baspasóz qyzmetiniń habarlaýynsha, endi elektrondyq tsıfrlyq qoltańba (ETsQ) arqyly birinshi kezeńde júıege kirgennen keıin paıdalanýshy ózin 1414 nómirinen keletin SMS-kod arqyly qosymsha rastaýy qajet.
Jańa avtorızatsııa júıesi aqparattyq qaýipsizdik deńgeıin arttyrýǵa jáne memlekettik onlaın-qyzmetterdi paıdalaný kezinde paıdalanýshy derekterin qorǵaýǵa baǵyttalǵan.
Ekinshi kezeń avtorızatsııasy ETsQ kiltin joǵaltý nemese úshinshi tulǵalardyń paıdalanýshy kiltin paıdalanyp eGov.kz portalynda zańsyz qol jetkizý áreketterinen azamattardy qorǵaıdy. Muny iske asyrý úshin paıdalanýshyny portalda tirkelgen mobıldi telefon nómiri arqyly rastaý qajet.
1414 nómirinen SMS kelmese ne isteý kerek?
SMS-kodtardy durys alý úshin paıdalanýshynyń telefony eGov.kz portalyndaǵy eseptik jazbaǵa tirkelgenin tekserý qajet. Eger nómir tirkelmese, habarlamalar kelmeıdi. Mobıldi telefon nómirin portaldaǵy eseptik jazbaǵa tirkeý boıynsha nusqaýlyqty osy jerde qaraýǵa bolady.
SMS-kodsyz avtorızatsııanyń balamaly tásili bar ma?
Paıdalanýshy eGov Mobile mobıldi qosymshasy arqyly da avtorızatsııalana alady. Ol úshin portaldaǵy avtorızatsııa betinde kórsetilgen arnaıy QR-kodty mobıldi qosymsha arqyly skanerleý qajet.
Paıdalanýshy shetelde bolsa ne isteý kerek?
Qazaqstan Respýblıkasynyń sheginen tys júrgen jaǵdaıda 1414 nómirinen SMS habarlamalar tek halyqaralyq roýmıng qosylǵanda ǵana keledi. Sondyqtan shetelde portal qyzmetterin paıdalaný aldynda roýmıng qyzmetiniń qosylǵanyn tekserý mańyzdy.
-Mańyzdy! Elektrondyq tsıfrlyq qoltańba kiltterin úshinshi tulǵalarǵa berý qaýipsizdik talaptaryna sáıkes tyıym salynǵan. Sebebi ETsQ – jeke sáıkestendirý quraly jáne jeke qoltańbamen teńestiriledi. ETsQ-ny basqa tulǵalarǵa bergeni úshin ákimshilik jaýapkershilik qarastyrylǵan,-delingen habarlamada.
Sondaı-aq onda ETsQ-men jumys kezinde quqyqbuzýshylyqtyń aldyn alý úshin zańdy tulǵanyń qujattaryn tek basshy nemese uıymnyń resmı ókiletti tulǵalary ǵana qol qoıa alatyny aıtylǵan.
Árkim óz atyna berilgen ETsQ-ny paıdalanady, al senimhat tek osy tulǵanyń qujatqa qol qoıýǵa quqyǵy bar ekenin rastaıdy. Eger qujattardy qol qoıý júıesi qosymsha ókilettilikterdi talap etse, júıe ıesinen is-áreket tártibin naqtylaý qajet.
Jeke tulǵalar men jeke kásipkerler óz atynan qujatqa qol qoıý úshin basqa tulǵany resmı ókilettikpen taǵaıyndaı alady. Bul jaǵdaıda árkim óz atyna berilgen ETsQ-ny paıdalanady.
Zańbuzýshylyq anyqtalǵan jaǵdaıda jeke jáne zańdy tulǵalar ákimshilik jaýapkershilikke tartylady. Tártip buzýshynyń sanatyna qaraı kelesi mólsherde aıyppuldar qarastyrylǵan:
jeke tulǵalarǵa – 50 AEK (196 600 teńge);
laýazymdy tulǵalarǵa, shaǵyn bıznes sýbektilerine jáne kommertsııalyq emes uıymdarǵa – 100 AEK (393 200 teńge);
orta bıznes sýbektilerine – 150 AEK (589 800 teńge);
iri bıznes sýbektilerine – 200 AEK (786 400 teńge).
- Avtorızatsııalaý tártibindegi ózgeris «Aqparattyq-kommýnıkatsııalyq tehnologııalar jáne aqparattyq qaýipsizdik salasyndaǵy biryńǵaı talaptardy bekitý týraly» qujattyń 47-tarmaǵyna sáıkes engizildi, onda kópfaktorly aýtentıfıkatsııany mindetti túrde qoldaný qarastyrylǵan. Jańartylǵan avtorızatsııalaý tártibi jeke jáne zańdy tulǵalarǵa birdeı qoldanylady, - delingen baspasóz qyzmetiniń aqparatynda.
Osyǵan deıin oqýshylardy mektepten mektepke aýystyrýdy EGov portaly arqyly rásimdeýge bolatyny týraly jazdyq.