eGov.kz eńbek ımmıgranttaryna ruqsat berý jáne ony uzartý tártibin jańartty
ASTANA. KAZINFORM — eGov.kz portalynda eńbek ımmıgranttaryna ruqsat berý jáne ony uzartý qyzmeti jańartyldy. Endi qujattardy rásimdeý burynǵydan da jyldam ári jeńil: qajetti derekterdiń edáýir bóligi avtomatty túrde júıege engiziledi, dep habarlaıdy «Ulttyq aqparattyq tehnologııalar» AQ basqarmasynyń baspasóz qyzmeti.
Bul qyzmet shetel azamattaryna Qazaqstan aýmaǵynda jeke tulǵalardyń úı sharýashylyǵynda jumys isteýge arnalǵan ruqsatty onlaın túrde rásimdeýge nemese onyń merzimin uzartýǵa múmkindik beredi.
Ótinish berý úshin shetel azamaty aldyn ala birqatar kóshi-qon rásimderinen ótýi qajet. Atap aıtqanda, shaqyrtý alý, jeke sáıkestendirý nómirin (JSN) rásimdeý, sondaı-aq Qazaqstannyń mobıldi azamattar bazasynda tirkelgen telefon nómiriniń bolýy talap etiledi.
Jańartýdan keıin eGov.kz portalynda paıdalanýshylarǵa keıbir qujattardy qolmen júkteýdiń qajeti joq. Máselen, medıtsınalyq anyqtama (028/ý nysany) jáne saqtandyrý týraly derekter memlekettik aqparattyq júıelerden avtomatty túrde alynady. Bul ótinish berý ýaqytyn qysqartyp, qatelik jiberý yqtımaldyǵyn azaıtady.
— Biz memlekettik qyzmetterdi onlaın formatta usynýdy júıeli túrde damytyp kelemiz. Eńbek ımmıgranttaryna ruqsat berý jáne ony uzartý qyzmetiniń jańartylýy tekserýlerdiń bir bóligin avtomattandyrýǵa jáne memlekettik aqparattyq júıelermen ıntegratsııany júzege asyrýǵa múmkindik berdi. Nátıjesinde ótinish berý kezinde qaǵaz qujattar sany azaıyp, qyzmet alý úderisi paıdalanýshylar úshin anaǵurlym yńǵaıly bola tústi, — dep atap ótti «Ulttyq aqparattyq tehnologııalar» AQ Basqarma tóraǵasy Daýlet Bekmanov.
Ótinishti toltyrý jáne jiberý kezinde júıe avtomatty tekserýler júrgizedi. Eger sáıkessizdikter anyqtalsa nemese qajetti derekter jetkiliksiz bolsa, paıdalanýshyǵa habarlama kórsetilip, kemshilikter joıylǵanǵa deıin ótinishti jiberý múmkin bolmaıdy.
Ótinish jiberilgennen keıin qyzmet kórsetý mártebesi eGov.kz portalyndaǵy paıdalanýshynyń Jeke kabınetinde kórsetiledi. Ruqsatty berý nemese onyń merzimin uzartý týraly sheshimdi ishki ister organdarynyń aýmaqtyq bólimshelerimen kelisilgennen keıin aýdandyq jáne oblystyq mańyzy bar qalalardyń jergilikti atqarýshy organdary qabyldaıdy.
Ruqsat belgilengen eńbek ımmıgranttaryn tartý kvotasy sheginde 1 aıdan 12 aıǵa deıingi merzimge beriledi. Qazirgi tańda qyzmetti Halyqqa qyzmet kórsetý ortalyqtaryna jeke júginý arqyly da alýǵa bolady. Memlekettik qyzmetti alý tártibi týraly qosymsha aqparat eGov.kz portalynda jáne onyń áleýmettik jelilerdegi resmı paraqshalarynda jarııalanǵan.
Jańartý QR Jasandy ıntellekt jáne tsıfrlyq damý mınıstrligi Memlekettik kórsetiletin qyzmetter komıtetiniń, «Ulttyq aqparattyq tehnologııalar» AQ, QR Іshki ister mınıstrligi, QR Densaýlyq saqtaý mınıstrligi, QR Eńbek jáne halyqty áleýmettik qorǵaý mınıstrligi jáne Memlekettik kredıttik bıýronyń birlesken jumysynyń nátıjesinde júzege asyryldy.
Osydan buryn vuqtaj jandar eGov Mobile arqyly áleýmettik kómekke ótinish bere alatynyn jazdyq.
