eGov jáne memlekettik servısterge kirý qaýipsizdigi kúsheıtildi
ASTANA. KAZINFORM — 1414 SMS-shlıýzi endi tek bıometrııa, ETsQ nemese eGov QR arqyly qoljetimdi bolady, dep habarlaıdy Jasandy ıntellekt jáne tsıfrlyq damý mınıstrliginiń baspasóz qyzmeti.
Mınıstrlik Bas prokýratýranyń úılestirýimen qazaqstandyqtardy telefon alaıaqtarynyń áreketterinen qorǵaýdy kúsheıtý boıynsha sharalar qabyldap jatyr.
Buǵan deıin birqatar memlekettik aqparattyq resýrstar men servısterge kirý bir rettik kod arqyly ǵana júrgizildi. Saldarynan alaıaqtar aılasyn asyrdy, «jábirlenýshiniń» telefon nómirin engizip, 1414 nómiri arqyly SMS-habarlama jiberip otyrdy.
Osyǵan baılanysty aqparattyq júıelerdiń ıelerine 1414 nómirinen SMS jiberý tetigin qoldaný úshin qoljetimdilik talaptaryn kúsheıtý tapsyryldy.
— Endi 1414 SMS-shlıýzin paıdalanatyn aqparattyq júıelerge kirý qosymsha qorǵalady jáne tek bıometrııalyq aýtentıfıkatsııa (FaceID), elektrondyq tsıfrlyq qoltańba (ETsQ) nemese arnaıy QR-kod (eGov QR) arqyly ǵana múmkin bolady. Osy jyldyń jeltoqsan aıynan bastap joǵaryda kórsetilgen mindetti talaptardy engizbegen aqparattyq júıeler 1414 SMS-shlıýzin paıdalaný qyzmetinen ajyratylady, — delingen vedomstvo habarlamasynda.
JITsDM barlyq memlekettik organdarmen birlesip, alaıaqtyqqa qarsy kúres jáne qazaqstandyqtardyń jeke derekterin qorǵaý boıynsha júıeli jumysty jalǵastyrady.
Azamattardyń tsıfrlyq saýattylyǵyn arttyrý maqsatynda eGov Mobile mobıldi qosymshasynda kúdik týǵyzatyn áreketterdi anyqtaý, kıbergıgıena talaptaryn saqtaý jáne tsıfrlyq servısterdi qaýipsiz paıdalaný jónindegi usynystary bar aqparattyq bannerler ornalastyryldy.
Jasandy ıntellekt jáne tsıfrlyq damý mınıstrligi atap ótkendeı, qabyldanyp jatqan barlyq sharalar «Zań jáne tártip» tujyrymdamasyn ilgeriletý aıasynda júzege asyrylyp, quqyqtyq tártipti nyǵaıtýǵa jáne memlekettik tsıfrlyq servısterge azamattardyń senimin arttyrýǵa baǵyttalǵan.
Budan buryn alaıaqtar qalaı 1414 nómirinen SMS jiberetinin anyqtap kórgen edik.