Egov jáne InDriver platformalaryna jańa servıs engizildi

ASTANA. KAZINFORM – Bas kólik prokýratýrasy «Zań men tártip» tujyrymdamasyn iske asyrý aıasynda jańa tsıfrlyq profılaktıka formatyn iske qosqanyn habarlady.

Endi qazaqstandyqtar ártúrli quqyqbuzýshylyqtar týraly – alaıaqtyqtan bastap esirtki aınalymyna jáne ózge de qylmystyq shemalarǵa deıin – jedel aldyn alý aqparatyn Egov Mobile jáne InDriver qosymshalary arqyly ala alady.

Egov Mobile qosymshasynyń basty betine arnaıy ınteraktıvti bólim ornalastyrylǵan. Osy bólimge ótken paıdalanýshylar prokýratýra organdarynyń resmı saıtyna baǵyttalady. Onda túsindirme materıaldar, keń taraǵan qylmystyq shemalardan qorǵaný boıynsha usynymdar, sondaı-aq qylmystyq jaýaptylyq týraly málimetter jarııalanǵan. Aqparattyń berilý formaty ony barynsha qoljetimdi ári túsinikti etýge baǵyttalǵan.

Osyǵan uqsas profılaktıkalyq bannerler men push-habarlamalar InDriver platformasyna da engizildi. Bul aýdıtorııany aıtarlyqtaı keńeıtip, aldyn alý mazmunyn eldiń kez kelgen óńirindegi azamattarǵa qoljetimdi etti.

Tsıfrlyq sheshimder profılaktıkany jańǵyrtý boıynsha júıeli jumys aıasynda júzege asyrylyp, Memleket basshysynyń «Zań men tártip» bastamasymen úılesimde oryndalyp jatyr.

Basty maqsat — halyqtyń habardarlyǵyn arttyrý, quqyqbuzýshylyqtardyń aldyn alý jáne ózekti eskertýlerdi jedel túrde keń aýdıtorııaǵa jetkizý.

Profılaktıkalyq servıs táýlik boıy jumys isteıdi, al jańartýlar men eskertýler paıdalanýshylarǵa turǵylyqty óńirine qaramastan qoljetimdi.

Buǵan deıin Májiliste ıAndeks, InDriver sııaqty platformalarǵa jańa talap qoıý usynylǵanyn jazǵan edik.