eGov-tyń jańartylǵan mobıldi qosymshasy iske qosylady

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh óndirisi mınıstri Asqar Jumaǵalıev eGov-tyń jańartylǵan mobıldi qosymshasy iske qosylatynyn málim etti, dep habarlaıdy QazAqparat tilshisi.

«Biz memlekettik qyzmetterdi mobıldi túrde alýǵa basa kóńil bólip otyrmyz. Óıtkeni, búgingi tańda azamattardyń bárinde smartfon bar. Sol sebepti, eGov-tyń mobıldik qosymshasyn jańartý jumystary bastalǵan kezde áriptesterime – eń aldymen, bul qosymshany ózderińizdiń analaryńyz paıdalana alatyndaı yńǵaıly etip jasańyzdar dedim. Sebebi, qosymsha qyzmetti ońaı ári jyldam alý úshin yńǵaıly bolýy kerek», - dedi Asqar Jumaǵalıev elordadaǵy «Tsıfrlyq kúz» sharasynda.

Mınıstrdiń sózine sensek, jańa qosymshanyń kómegimen qyzmetti saýsaqpen bir basyp qana alýǵa bolady. Mobıldi qosymshanyń Beta nusqasy PlayMarket jáne Appstore-da jaqyn arada qoljetimdi bolady. Ol arqyly qyzmettiń 23 túrin alýǵa, ETsQ-ǵa ótinim berýge múmkindik bar.

«Tsıfrlyq kúzge» jınalǵandarǵa mobıldik qosymshanyń múmkindikterin tanystyrǵan «Ulttyq aqparattyq tehnologııalar» AQ Basqarma tóraǵasy Áset Turysov ETsQ-ny paıdalanýdy barynsha jeńildetýge kúsh salynǵanyn tilge tıek etti.

«Jańa qosymshany paıdalaný úshin azamat ETsQ-ny asa qajet etpeıdi. Biz bárimiz telefonnyń qulpyn saýsaq izimen nemese FaceID arqyly ashýdy ádetke aınaldyrdyq. Dál solaı osy qosymshada ETsQ-ny bıometrııaǵa baılap, qyzmetke tapsyrys bergen kezde ózińizdiń TouchID nemese FaceID arqyly suraýyńyzdy rastaı alasyz», - dedi ol.