eGov-tyń 1414 baılanys ortalyǵy jeke menshikke beriledi

ASTANA. QazAqparat - «Ulttyq aqparattyq texnologııalar» AQ birqatar fýnktsııalaryn básekelestik salaǵa berýdi kózdeıdi, dep xabarlaıdy QazAqparat tilshisi.

Kompanııanyń basqarma tóraǵasy Áset Turysovtyń aıtýynsha, jospar boıynsha bıyl birneshe qyzmet jeke menshikke beriledi.

«Biz Aqparat jáne kommýnıkatsııalar mınıstrligimen, sondaı-aq, basqa da memlekettik organdarmen birlese otyryp, birneshe fýnktsııadan bas tartyp, ony jeke menshik salaǵa berýdi kózdeımiz. Máselen, texnıkalyq qyzmet bar. Búginde jeke menshik naryqta kompıýter, prınter jáne taǵy basqa qural-jabdyqtarǵa texnıkalyq qyzmet kórsetetin kompanııalar kóp. Sondyqtan osy fýnktsııany berýge bolady. Budan bólek, 1414 biryńǵaı baılanys ortalyǵyn da básekelestik ortaǵa beretin shyǵarmyz. Sebebi búginde baılanys ortalyqtary da barshylyq. Olar osy fýktsııany atqara alady», - dedi Á.Turysov Astanada ótken baspasóz máslıxatynda.

Onyń sózine qaraǵanda, osy saladaǵy jumys jalǵasa beredi. Máselen, «bulttyq qujat aınalymy» qyzmetin de básekelestik ortaǵa berý josparlanǵan.

Aıta keteıik, «Ulttyq aqparattyq texnologııalar» AQ jeke qujattardyń elektrondy qoımasyn iske qosýdy josparlap otyr. Ol Digi Locker dep atalady.