eGov-ta otbasynyń ál-aýqatyn baǵalaıtyn kalkýlıator paıda bolady
ASTANA. KAZINFORM — Qazaqstandyqtar eGov portaly men eGov Mobile qosymshasy arqyly otbasynyń ál-aýqat deńgeıin aldyn ala baǵalap, qaı sanatqa jatýy múmkin ekenin bile alady. Bul málimet keıbir memlekettik járdemaqylardy alý quqyǵyn anyqtaýǵa kómektesedi.
Bul týraly Ortalyq kommýnıkatsııalar qyzmetinde ótken brıfıngte Eńbek jáne halyqty áleýmettik qorǵaý vıtse-mınıstri Baqtııar Jazyqpaev aıtyp berdi.
Vıtse-mınıstrdiń aıtýynsha, onlaın-kalkýlıator tehnıkalyq synaqtan ótken. Ony 16-17 qazanda eGov portaly men mobıldi qosymshada iske qosý josparlanǵan.
Jańa servıs arqyly azamattar otbasy quramy men tabysyna qatysty málimetterdi ózderi engizip, ál-aýqat sanaty boıynsha aldyn ala baǵalaý nátıjesin ala alady.
— Kalkýlıatordy búgin-erteń eGov arqyly jarııalaımyz. Áleýmettik jelilerde taraǵan kalkýlıatorlardyń eshqaısysy shynaıy málimetke negizdelmegen. Kelesi aptadan bastap halyqqa habarlama jiberýdi josparlap otyrmyz. Qazir synaq aıasynda shamamen 200 habarlama joldandy, — dedi Baqtııar Jazyqpaev.
Habarlamalarda memlekettik járdemaqylar taǵaıyndaýdyń jańa tártibi túsindiriledi. Bul ózgerister 2027 jylǵy 1 qańtardan bastap kúshine enedi. Atap aıtqanda, azamattarǵa áleýmettik kómektiń naqty muqtaj adamdarǵa baǵyttalý qaǵıdattary jáne tólemderden óz erkimen bas tartý múmkindigi týraly aqparat beriledi.
Mundaı habarlamalarda otbasynyń ál-aýqat sanatyna jatqyzylǵany týraly resmı sheshim bolmaıdy. Kalkýlıatordyń nátıjesi aldyn ala baǵalaý úshin qoldanylady.
Aıta keteıik, Eńbek jáne halyqty áleýmettik qorǵaý mınıstri Asqarbek Ertaev otbasynyń ál-aýqatyn baǵalaıtyn onlaın-kalkýlıator arqyly óz otbasyn tekserip kórdi. Nátıjesinde onyń otbasy V sanatyna jatqyzyldy.
V sanaty — ekonomıkalyq turǵydan turaqty, jetkilikti deńgeıdegi otbasylar. Bul kategorııaǵa 14 túrli járdemaqy berý toqtatylady.
Eske sala ketsek, endi er adam dekretke shyqsa da, járdemaqy áıelge beriledi.
Balasy 1,5 jasqa tolmaı jumysqa shyqqan analardyń járdemaqysy saqtalady.
