eGov-ta mekenjaıdyń ózgergeni týraly aqparatty kórsetetin jańa servıs iske qosyldy
NUR-SULTAN. QazAqparat - eGov.kz portaly jáne eGov mobile qosymshasynda mekenjaıdyń ózgergeni týraly aqparatty kórsetetin jańa servıs iske qosyldy. Bul týraly QR tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Instagram-daǵy paraqshasynda jazdy.
«eGov.kz portaly jáne eGov mobile qosymshasynda mekenjaıdyń ózgergeni týraly aqparatty kórsetetin jańa servıs iske qosyldy, ıaǵnı jyljymaıtyn múlik obektisi mekenjaıynyń ózgerýi tarıhyn osy arqyly bilýge bolady. Ádette mundaı másele jyljymaıtyn múlikti satý nemese múlik kepilin tirkeý kezinde týyndaıdy.
Servıstiń kómegi qandaı? Túsindire keteıin.Bálkim, bireýlerdiń jyljymaıtyn múlikti satý kezinde turǵylyqty mekenjaıynyń ózgergenin anyqtap, al ol málimetterdi rastaý úshin Halyqqa qyzmet kórsetý ortalyǵyna baryp ýaqytyn joǵaltyp, áýre-sarsańǵa túsken kezderi bolǵan shyǵar.
Osylaısha, jańa servıs notarıýstar men bankterge óz klıentterin HQKO-ǵa jibermeı, osy derekterdi tikeleı alýǵa múmkindik beredi» delingen habarlamada.
Mınıstrdiń aıtýynsha, eger azamattardyń qujattarynyń tsıfrlyq nusqasy bolsa, olardan túrli anyqtamalardy talap etý zań júzinde tyıym salynady. Osylaısha, qyzmet kórsetý ýaqyty qysqaryp, jumys protsesi jedeldetiledi. Atalǵan jańashyldyq Memleket basshysynyń memlekettik apparatty bıýrokratııadan aryltý saıasatyna negizdelgen.
Málimetterdi bilý jáne rastaý úshin mekenjaıdyń tirkeý kodyn bilý jetkilikti. Qajetti aqparat eGov.kz portalynda «Servıster» bóliminde jáne eGov mobile qosymshasynda «Jyljymaıtyn múlik jáne TKSh» bóliminde qol jetimdi bolady. Osylaısha jyljymaıtyn múliktiń mekenjaıynyń ózgerý tarıhy kórsetiledi.
Atalǵan servıs - memlekettik qyzmetter komıtetiniń, memlekettik nesıe bıýrosynyń aqparattyq júıelerin jáne biryńǵaı notarıaldyq aqparattyq júıesin ıntegratsııalaý jolymen iske asyryldy.
