eGov-ta qorǵanshylar men qamqorshylardyń mártebesin tekserýge arnalǵan servıs iske qosyldy
ASTANA. KAZINFORM – eGov.kz portalynda qorǵanshylyq jáne qamqorshylyq týraly anyqtamalardy suratýǵa múmkindik beretin jańa tsıfrlyq servıs iske qosyldy. Bul qyzmet jetim jáne ata-anasynyń qamqorlyǵynsyz qalǵan balalardyń qamqorshylary týraly aqparatty alý protsesin jeńildetedi.
Qyzmet paıdalanýshylarǵa memlekettik organdar men ýákiletti tulǵalar úshin qamqorshy mártebesin onlaın rastaýǵa múmkindik beredi. Anyqtamany alý úshin suraý jiberý jetkilikti jáne ony mindetti túrde qamqorshy rastaýy kerek. Barlyq derekter avtomatty túrde memlekettik derekqorlardan júkteledi, bul protsestiń jyldamdyǵy men ashyqtyǵyn qamtamasyz etedi.
Qyzmetti paıdalaný úshin:
- eGov.kz portalynda avtorızatsııadan ótip «Azamattarǵa» - «Kólik jáne kommýnıkatsııalar» - «Kommýnıkatsııalar» bólimine ótý qajet;
- «Úshinshi tulǵalardyń anyqtamalardy alý servısi» bólimin tańdap, «Onlaın suraý» batyrmasyn basý kerek;
- JSN-di engizip, «Qamqorshylyq jáne qorǵanshylyq týraly anyqtama berý» qyzmetin tańdaý qajet;
- qajetti óristerdi toltyryp, aımaqty tańdap, «Suraý salý» batyrmasyn basý kerek.
Osydan keıin qamqorshyǵa suranysty rastaý úshin 1414 nómirinen SMS habarlama keledi. Sonymen qatar, suranys týraly habarlama paıdalanýshynyń eGov.kz portalyndaǵy jeke kabınetinde kórsetiledi. Qaýipsizdik pen derbes derekterdiń qorǵalýyn qamtamasyz etý úshin protsess habarlama alynǵan sátten bastap, eki saǵat ótken soń aıaqtalady.
Qamqorshy suranysty rastasa, anyqtama ótinish berýshiniń jeke kabınetinde «Qyzmetter alý tarıhy» bóliminde qoljetimdi bolady. Eger qamqorshy suranystan bas tartatyn bolsa, mártebe betinde onyń sebebi kórsetilip, jeke kabınettiń «Kiris» bóliminde tıisti habarlama paıda bolady.
Jańa servıs QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń Memlekettik kórsetiletin qyzmetter komıteti, «Ulttyq aqparattyq tehnologııalar» AQ, QR Oqý-aǵartý mınıstrliginiń birlesken jumysynyń arqasynda iske asyryldy.
Aıta keteıik, byltyr qazaqstandyqtar eGov arqyly 44 mln qyzmet alǵan.