eGov-ta adam aýrýhanaǵa túsken jaǵdaıda jaqyndaryna habarlaıtyn servıs iske qosyldy
ASTANA. KAZINFORM — Endi eGov arqyly aýrýhanaǵa túsken jaǵdaıda kimge habarlanatynyn aldyn ala tańdaýǵa bolady, dep habarlaıdy Densaýlyq saqtaý mınıstrliginiń baspasóz qyzmeti.
eGov.kz elektrondyq portalynda jáne eGov Mobile mobıldik qosymshasynda shuǵyl emdeýge jatqyzý týraly habarlama jiberetin jańa tegin servıs iske qosyldy.
— Eger adam jol-kólik oqıǵasyna ushyrasa, ózin kenetten nashar sezinse nemese basqa da sebeppen aýrýhanaǵa túsip, jaqyndaryna óz betinshe habarlasa almasa, endi onyń emdeýge jatqyzylǵany týraly ózi aldyn ala tańdaǵan jaqyn adamdary habardar bola alady. Osy maqsatta eGov portalynda «Emdeýge jatqyzylǵan jaǵdaıda habarlaý úshin senim bildirilgen baılanystardy tirkeý» jańa qyzmeti paıda boldy. Paıdalanýshy emdeýge jatqyzylǵan jaǵdaıda habarlama jiberiletin senim bildirilgen úsh adamǵa deıin kórsete alady, — delingen habarlamada.
Jańa servıs Densaýlyq saqtaý mınıstrligi men Jasandy ıntellekt jáne tsıfrlyq damý mınıstrliginiń birlesken jumysy sheńberinde iske asyryldy. Bul sheshim shuǵyl emdeýge jatqyzylǵan jaǵdaıda aldyn ala habardar etilýi tıis adamdardyń tizimin belgileýge múmkindik beredi.
eGov.kz portalynda:
* portalǵa avtorızatsııadan ótý;
* «Emdeýge jatqyzylǵan jaǵdaıda habarlaý úshin senim bildirilgen baılanystardy tirkeý» qyzmetin tańdaý;
* senim bildirilgen adamnyń JSN-yn kórsetý qajet.
Senim bildirilgen baılanystaǵy adam 18 jastan asqan jáne Mobıldik azamattar bazasynda tirkelgen bolýy tıis.
— Odan keıin paıdalanýshy derbes derekterdi óńdeýge jáne densaýlyq jaǵdaıy týraly málimetterdi berýge kelisimin rastap, suraý salýdy jiberedi. Kórsetilgen adamǵa tirkeýdi rastaý nemese odan bas tartý týraly usynys bar SMS-habarlama keledi. Rastaý úshin jaýap SMS-habarlama arqyly 911 kodyn, al bas tartý úshin 912 kodyn jiberý qajet. Sheshim qabyldaýǵa bes saǵatqa deıin ýaqyt beriledi. Eger senim bildirilgen baılanys tirkeýdi rastasa, paıdalanýshy suraý salýǵa qol qoıady. Osydan keıin tirkelgen baılanys týraly málimetter Densaýlyq saqtaý mınıstrliginiń aqparattyq júıesine beriledi, — delingen habarlamada.
eGov Mobile mobıldik qosymshasynda servıs «Memlekettik qyzmetter» → «Densaýlyq saqtaý» bóliminde ornalasqan.
Paıdalanýshy senim bildirilgen baılanystardy tirkeý qyzmetin tańdap, joǵaryda sıpattalǵan rásimnen ótýi qajet. Ótinishti Densaýlyq saqtaý mınıstrliginiń aqparattyq júıesinde óńdeý 10 mınýtqa deıin ýaqyt alady.
Tirkeýdiń ózekti mártebesi eGov.kz portalyndaǵy «Meniń beıinim — Jeke kabınet» bóliminde, al eGov Mobile qosymshasynda «Habarlamalar — Jeke kabınet tarıhy» bóliminde kórsetiledi.
Aıta keteıik, servıs jaqyn adamdardyń jaǵdaı týraly aqparatty neǵurlym jedel alyp, patsıentpen nemese medıtsınalyq uıymmen der kezinde baılanysýyna múmkindik berý maqsatynda quryldy.
Budan buryn endi eGov GPT arqyly memlekettik qyzmet alýǵa bolatynyn jazǵan edik.
