eGov Mobile mobıldi qosymshasynan endi turǵyn úı kezegi týraly bilýge bolady
ASTANA. KAZINFORM - eGov Mobile qosymshasynda jańa «Turǵyn úıge muqtajdar esebine qoıý boıynsha suraqtar» anyqtamalyq bólimi paıda boldy, dep habarlaıdy «Ulttyq aqparattyq tehnologııalar» AQ Korporatıvtik kommýnıkatsııalar departamentiniń baspasóz qyzmeti.
Osyǵan baılanysty endi qosymshany paıdalanýshylar mynadaı jıi qoıylatyn suraqtarǵa jaýap ala alady: turǵyn úı kezegine kim tura alady, ótinimdi qaraý qansha ýaqytty alady, eger turǵyn úı týystardyń atyna rásimdelgen bolsa, ótinim berýge bola ma jáne taǵy basqalary.
Bul jańartý 2025 jylǵy 24 mamyrdan bastap ótinimder qabyldanatyn Otbasy bankiniń jańa ınternet-portaly – orken.otbasybank.kz saıtynyń iske qosylýyna oraı engizildi. Endi ótinim berý protsesi tolyqtaı onlaın rejımde júzege asady – ótinim berý úshin ETsQ arqyly avtorızatsııadan ótý qajet.
«Turǵyn úımen qamtamasyz etý ortalyǵy» aqparattyq júıesi – Otbasy bankiniń biryńǵaı tsıfrlyq platformasy retinde jumys isteıdi jáne 14 memlekettik derekqorǵa qosylǵan. Júıe azamattyń turǵyn úıiniń bar-joǵy, tabysy, otbasy quramy jáne muqtajdyq mártebesi týraly derekterdi avtomatty túrde tekseredi. Adam faktory joq, esep júrgizý tolyǵymen avtomattandyrylǵan. Ótinimdi qaraý nátıjesinde azamatqa sheshim týraly 1414 qysqa nómirinen SMS-habarlama keledi – ótinimniń maquldanǵany nemese bas tartylǵany kórsetiledi.
Paıdalanýshylarǵa yńǵaıly bolý úshin eGov Mobile qosymshasynda osy baǵdarlama sharttarymen aldyn ala tanysýǵa kómektesetin anyqtamalyq aqparat ornalastyrylǵan. Atalǵan bólimdi qosymshanyń basty betindegi «Tanymal qyzmetter» bóliminen tabýǵa bolady.
Osyǵan deıin Almatyda 1 shilde kúni týrısterge arnalǵan jańa qosymsha iske qosylatyny týraly jazdyq.