eGov Mobile men Gov.kz-te saılaý ýchaskesin tekseretin servıs qosyldy
ASTANA. KAZINFORM — eGov Mobile mobıldi qosymshasy men Gov.kz portalynda azamattarǵa aldaǵy 2026 jylǵy 23 tamyzda ótetin Quryltaı saılaýynda saılaý ýchaskesiniń nómiri men mekenjaıyn aldyn ala anyqtaýǵa múmkindik beretin jańa servıs iske qosyldy.
Jańa servıs azamattarǵa daýys berý protsesi týraly qajetti aqparatty aldyn ala alýǵa jáne saılaýǵa qatysýdy barynsha yńǵaıly etýge baǵyttalǵan. Endi saılaýǵa qatysty negizgi aqparat eGov Mobile qosymshasynda bir jerge jınaqtalǵan.
eGov Mobile qoldanbasynda servısti paıdalaný úshin:
- eGov Mobile qosymshasyna avtorızatsııadan ótý;
- basty bettegi «Memlekettik qyzmetter» bóliminiń tómengi jaǵynda ornalasqan «Quryltaı-2026» belgishesin tańdaý;
- ózińizdiń saılaý ýchaskeńiz týraly aqparatty tekserý qajet.
— Saılaýǵa daıyndyq aıasynda eGov Mobile qosymshasynda jańa servısti iske qosyp otyrmyz. Alǵash ret Quryltaı saılaýyna qatysty negizgi aqparat bir bólimge jınaqtaldy. Endi azamattarǵa qajetti málimetti ártúrli aqparat kózderinen izdeýdiń qajeti joq. Servıstiń negizgi maqsaty — azamattardyń saılaýǵa qatysýyn barynsha jeńildetý jáne saılaý protsesiniń ashyqtyǵy men jarııalylyǵyn qamtamasyz etý. Sonymen qatar azamattar úshin gov.kz/sailau, sailau.gov.kz jáne sailau2026.gov.kz aqparattyq resýrstary qoljetimdi. Atalǵan platformalarda azamattar JSN arqyly ózderiniń saılaý ýchaskesin anyqtaı alady, — dedi QR Jasandy ıntellekt jáne tsıfrlyq damý birinshi vıtse-mınıstri Rostıslav Konıashkın atap ótti.
eGov Mobile qosymshasyndaǵy servıs azamattarǵa daýys berýge qatysý úshin qajetti negizgi aqparattyń barlyǵyn usynady. Atap aıtqanda:
- saılaý ýchaskesiniń nómiri men naqty mekenjaıy;
- tirkelgen saılaý ýchaskesinen tys jerde daýys berý úshin esepten shyǵarý kýáligin alý tártibi týraly beınenusqaýlyq;
- daýys berý kúnine deıin qalǵan kún sanyn kórsetetin keri sanaq taımeri;
- saılaý jáne onyń mańyzy týraly jalpy aqparat;
- saılaýǵa qatysty ózekti jańalyqtar men is-sharalar;
- saılaý protsesin retteıtin normatıvtik quqyqtyq aktiler týraly paıdaly aqparat;
- JSN arqyly saılaý ýchaskesin izdeý múmkindigi. Bul servıs basty bettegi «Tanymal qyzmetter» bóliminde de qoljetimdi;
- azamattardyń jıi qoıatyn suraqtaryna jaýap beretin «Suraq-jaýap» bólimi.
Eske salaıyq, buǵan deıin daýys berý ýchaskeleri Quryltaı saılaýyna ázirligi týraly jazǵanbyz.
