eGov Mobile qosymshasynyń jańa nusqasy qazaqstandyqtarǵa qoljetimdi boldy
ASTANA. KAZINFORM — eGov Mobile mobıldi qosymshasy sońǵy jyldardaǵy eń aýqymdy jańartýdan ótti: ınterfeısi qaıta jasaldy, navıgatsııasy jetildirildi, ıntellektýaldy izdeý men tsıfrlyq qujattarǵa jedel qol jetkizý múmkindigi qosyldy.
Jańartý ósip kele jatqan suranysqa jaýap retinde iske asyryldy – bes jyl ishinde eGov Mobile qoldanýshylarynyń sany alty esege ósip, 11 mıllıonnan asty.
Intellektýaldy izdeý jáne vırtýaldy kómekshi
Basty jańalyqtardyń biri – ıntellektýaldy izdeý. Endi suranysty engizgen sátte barlyq sáıkes nátıjeler kórsetiledi: qyzmetter men ómirlik jaǵdaılar. Іzdeý jolaǵynyń janynda jasandy ıntellekt negizinde jumys isteıtin eGov AI vırtýaldy kómekshisi paıda boldy.
eGov AI qosymshaǵa kiriktirilgen jáne paıdalanýshylarǵa memlekettik qyzmetter jóninde qajetti aqparatty jyldam tabýǵa kómektesedi. Ol chat formatynda jumys isteıdi – suraq qoısańyz, kómekshi qarapaıym tilmen ne isteý keregin túsindiredi, qajet bolsa birden tıisti bólimge nemese qyzmetke baǵyttaıdy. Mundaı tásil ýaqytty únemdep, navıgatsııany jeńildetedi. Іzdeý jolaǵy janyndaǵy eGov AI belgishesin basý jetkilikti – sol sátte chat ashylyp, birneshe sekýnd ishinde jaýap alýǵa bolady.
Qaýipsizdik kúsheıtildi
Jańartý barysynda aqparattyq qaýipsizdikke erekshe mán berildi. Jeke derekterdi qorǵaý deńgeıi arttyryldy, júıeniń syrtqy qaýipterge tózimdiligin joǵarylatýǵa baǵyttalǵan tehnıkalyq jetildirýler engizildi.
Yńǵaıly navıgatsııa
Basty bette endi eń tanymal servısterdiń belgisheleri kórsetiledi – onyń ishinde memlekettik qyzmetterge jedel qol jetkizý múmkindigi de bar. Kózge birden túsetin jerge ornalastyrylǵan eGov logotıpi qyzmetter katalogyna tikeleı ótedi. Munda barlyq qyzmetter taqyryptar boıynsha rettelip berilgen. Navıgatsııa elektrondyq úkimet jáne E-lıtsenzııalaý portaly baǵyttary boıynsha bólingen. Tómengi bólikte jańa múmkindikter jónindegi qysqasha aqparattyq bannerler, sondaı-aq TOP-qyzmetter, tanymal jáne usynylǵan qyzmetter tizimi ornalasqan.
Jańartylǵan «Servıster» bólimi
Qoldanýshylar úshin barlyq tsıfrlyq servıster tizimi endi qosymshanyń tómengi mázirindegi «Servıster» belgishesi arqyly qoljetimdi. Basty bettegi tanymal servısterden bólek, munda barlyq qoljetimdi quraldar bólimder boıynsha toptastyrylǵan.
Interfeısi de yńǵaılyraq boldy: ár servıs qasynda túıreýish beınesindegi belgishe bar – ony basqanda qyzmet avtomatty túrde tanymaldar tizimine qosylady. Sondaı-aq negizgi fýnktsııalardy qysqasha sıpattaıtyn bannerler ornalastyrylǵan, bul qosymsha múmkindikterdi tezirek ıgerýge kómektesedi.
Tsıfrlyq qujattarǵa jedel qol jetkizý
«Tsıfrlyq qujattar» bólimi aıtarlyqtaı jańartyldy. Jeke kýálik, pasport, týý týraly kýálik jáne ózge de mańyzdy qujattar endi basty bette birden kórsetiledi – jeke bólimge kirýdiń qajeti joq. Bul qajetti qujatty nemese onyń túpnusqalyǵyn tekserýge arnalǵan QR-kodty lezde kórsetýge múmkindik beredi.
Ómirlik jaǵdaılar katalogy
Paıdalanýshylarǵa qolaıly bolýy úshin ómirlik jaǵdaılar boıynsha jeke katalog engizildi. Munda, mysaly, emhanaǵa tirkelý, qujattardy qalpyna keltirý nemese júrgizýshi kýáligin alý tártibi boıynsha kezeń-kezeńimen nusqaýlyq berilgen. Qajetti jaǵdaı tańdalǵan kezde qurylymdalǵan aqparat ashylady: qandaı áreketterdi oryndaý kerek, qaıda júginý qajet, qaı qyzmetti paıdalaný kerek jáne osy jaǵdaıda qandaı normatıvtik qujattar qoldanylady.
Ár ómirlik jaǵdaı ınteraktıvti saýalnama arqyly tolyqtyrylady. Onyń nátıjesi boıynsha paıdalanýshyǵa jeke stsenarıı usynylady. Eger usynylǵan sheshim sáıkes kelmese, saýalnamany qaıta ótip, balama nusqany alýǵa bolady.
eGov QR qyzmetiniń jetildirilýi
Endi ekranda qyzmettiń maqsaty týraly túsinikteme kórsetiledi, al qajet bolǵan jaǵdaıda túngi ýaqytta qoldanýǵa yńǵaıly bolý úshin ekran avtomatty túrde jaryqtanady.
«Habarlamalar» bólimin jańartý
Qyzmet mártebeleri, saýalnama nátıjeleri jáne mańyzdy jańartýlar týraly habarlamalar endi taqyryptar boıynsha toptastyrylǵan, bul qajetti aqparatty izdeýdi jeńildetedi.
Jeke profıldegi keńeıtilgen derekter
Profılde endi jeke málimetter, otbasy, densaýlyq, eńbek qyzmeti, aıyppuldar, múlik jáne basqa da salalarǵa qatysty aqparat kórsetiledi. Sondaı-aq berilgen kelisimder tarıhy qoljetimdi, al qajetti bólimge ótý aıqyn jáne logıkalyq navıgatsııa arqyly júzege asady.
eGov Mobile-dyń aýqymdy jańartýy QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń Memlekettik kórsetiletin qyzmetter komıteti men «Ulttyq aqparattyq tehnologııalar» AQ-nyń birlesken jumysynyń nátıjesi boldy.
Aıta keteıik, eGov portalynda memqyzmetter boıynsha qońyraý shalýǵa arnalǵan qosymsha nómir iske qosylady.