eGov Mobile qosymshasyndaǵy ál-aýqatty baǵalaý kalkýlıatory qalaı jumys isteıdi
ASTANA. KAZINFORM — QR Eńbek jáne halyqty áleýmettik qorǵaý mınıstrligi eGov Mobile mobıldi qosymshasyndaǵy «Ál-aýqatty baǵalaý kalkýlıatory» servısiniń jumysyna qatysty túsinikteme berdi. Mınıstrlik málimetinshe, onyń kómegimen járdemaqy alýshylar óz otbasynyń áleýmettik jaǵdaıyna aldyn ala baǵa berip, esepteý kezinde qandaı málimetter eskeriletinin óz betinshe kóre alady.
Kalkýlıator tek járdemaqy alýshylarǵa qoljetimdi. Servıs qazaq, orys jáne aǵylshyn tilderinde jumys isteıdi. Ony birneshe ret paıdalanýǵa bolady. Mysaly, engizilgen málimetterdi tekserý nemese esepteýdi qaıta júrgizý úshin.
Qosymshaǵa avtorızatsııadan ótkennen keıin keıbir málimetter memlekettik derekqorlardan avtomatty túrde júkteledi. Olardyń qatarynda paıdalanýshynyń jynysy men jasy, atyna tirkelgen jeńil jáne kommertsııalyq kólik quraldary, aýyl sharýashylyǵy tehnıkasy, jyljymaıtyn múlik, jer ýchaskeleri, sondaı-aq kásipkerlik qyzmetke qatysýy týraly aqparat bar. Bul derekterdi qaıta engizýdiń qajeti joq, tek olardyń ózektiligin tekserý jetkilikti.
Al qalǵan málimetterdi azamat ózi toltyrady. Atap aıtqanda, ózimen birge turatyn otbasy músheleri, olardyń jumyspen qamtylýy, múgedektigi nemese sozylmaly aýrýlarynyń bolýy, nesıeleri men múlki týraly aqparatty kórsetý qajet. Turǵyn úı, avtokólikter men jer ýchaskeleri otbasynyń ár múshesi boıynsha jeke engiziledi. Al otbasynyń syıaqylar men ústemeaqylardy qosa alǵandaǵy ortasha aılyq tabysy bir jalpy somamen kórsetiledi.
Esepteý nátıjesi engizilgen málimetterdiń tolyqtyǵy men durystyǵyna tikeleı baılanysty. Eger otbasy músheleriniń biri kórsetilmese nemese tabysy men múlki týraly aqparat engizilmese, aldyn ala baǵalaý naqty jaǵdaıǵa sáıkes kelmeýi múmkin. Sondyqtan esepteýdi bastamas buryn otbasy quramyn jáne engizilgen barlyq málimetti muqııat tekserý mańyzdy.
Eger kalkýlıatorda, mysaly, satylyp ketken avtokólik nemese ózektiligin joǵaltqan basqa múlik kórsetilse, málimetterdi servıstiń ózinde túzetýge bolady. Alaıda mundaı ózgerister tek aldyn ala esepteý úshin paıdalanylady jáne memlekettik derekqorlardaǵy resmı aqparatqa áser etpeıdi.
Resmı málimetterge túzetý engizý úshin eGov.kz portaly nemese eGov Mobile qosymshasy arqyly ýákiletti organǵa ne turǵylyqty jeri boıynsha Halyqty áleýmettik qorǵaý salasyndaǵy retteý jáne baqylaý komıtetiniń aýmaqtyq departamentine júginý qajet.
– Mańyzdy! Áleýmettik jelilerde taralǵan ál-aýqatty baǵalaý kalkýlıatorlaryn paıdalanbaýǵa keńes beremiz. Olar resmı servıster qataryna jatpaıdy jáne ondaǵy aqparat shynaıy bolmaýy múmkin. Durys nátıje alý úshin tek eGov Mobile qosymshasyndaǵy resmı «Ál-aýqat kalkýlıatoryn» paıdalanyńyz, - delingen mınıstrlik habarlamasynda.
Esepteý aıaqtalǵannan keıin paıdalanýshy aldyn ala nátıjemen tanysyp, oǵan kelisetinin nemese kelispeıtinin bildire alady. Sonymen qatar qosymshada kalkýlıator jumysyna bes baldyq shkala boıynsha baǵa berip, erkin formatta pikir qaldyrý múmkindigi qarastyrylǵan. Bul azamattardyń pikirin eskerip, servıstiń sapasyn arttyrýǵa yqpal etedi.
Osy tusta aldyn ala esepteý men járdemaqy taǵaıyndaý týraly resmı sheshimniń arajigin ajyrata bilý mańyzdy. Kalkýlıator tek aqparattyq-anyqtamalyq sıpatqa ıe. Onda kórsetilgen nátıje járdemaqynyń taǵaıyndalatynyn, mólsheri ózgeretinin nemese tólemniń toqtatylatynyn bildirmeıdi.
Nátıjege kelisý nemese kelispeý, servıske baǵa berý jáne pikir qaldyrý járdemaqyny taǵaıyndaýǵa, onyń mólsherine nemese tólemniń jalǵasýyna eshqandaı áser etpeıdi. Kalkýlıatordy paıdalaný járdemaqydan bas tartý týraly ótinish bolyp sanalmaıdy jáne tólemdi toqtatýǵa nemese ýaqytsha toqtata turýǵa negiz bola almaıdy.
Osylaısha, kalkýlıator otbasynyń ál-aýqatyna aldyn ala baǵa berýge, bastapqy málimetterdi tekserýge jáne qajet bolǵan jaǵdaıda esepteýdi qaıta júrgizýge múmkindik beredi. Bul rette áleýmettik qoldaý sharalaryn taǵaıyndaýdyń zańnamada belgilengen tártibi ózgerissiz qalady.
Aıta keteıik, endi otbasynyń ál-aýqat sanaty aı saıyn qaıta qaralady. Eger úıdiń qarjylyq jaǵdaıy ózgerse, júıe ony avtomatty túrde basqa sanatqa aýystyra alady. Bul týraly Eńbek jáne halyqty áleýmettik qorǵaý mınıstri Asqarbek Ertaev aıtyp berdi.
