eGov Mobile qosymshasynda jańa tsıfrlyq qujat paıda boldy
ASTANA. KAZINFORM — Endi kámeletke tolǵan azamattarǵa qamqorshylar týraly tsıfrlyq qujatty eGov Mobile qosymshasynan alýǵa bolady. Bul týraly Ulttyq aqparattyq tehnologııalar AQ habarlaıdy.
eGov Mobile mobıldi qosymshasynda kámelet jasyna tolǵan azamattarǵa qamqorshylyq jasaıtyn tulǵalar týraly málimetteri bar tsıfrlyq qujat qoljetimdi. Bul qujat «E-Sobes» aqparattyq júıesindegi derekter negizinde jasalady, ol jerde qamqorshylar, qorǵanshylar jáne olardyń qamqorlyǵyndaǵy azamattar týraly málimetter saqtalady.
Qujatta kelesi derekter qamtylǵan, qamqorshynyń aty-jóni, jeke sáıkestendirý nómiri, týǵan kúni, sondaı-aq qamqorlyǵyndaǵy azamattyń aty-jóni, jeke sáıkestendirý nómiri, týǵan kúni, qamqorshyny taǵaıyndaý týraly buıryqtyń nómiri men kúni, sonymen qatar «Jaramdy kúni» týraly aqparat bar. Qujattyń túpnusqalyǵyn rastaý úshin QR-kod qarastyrylǵan: ony skanerlegen kezde bir táýlik boıy jaramdy tsıfrlyq nusqasy ashylady.
Qujat «Tsıfrlyq qujattar» bóliminde «Qujattardy jańartý» batyrmasyn basqannan keıin, zańdy ókil mártebesi rastalǵan qoldanýshylarda avtomatty túrde paıda bolady.
Qamqorshy mártebesin resmı túrde rastaý qajet bolatyn jaǵdaıda, memlekettik tólemderdi alý, bankke, medıtsınalyq mekemelerge jáne basqa uıymdarǵa júginý kezinde — buıryqtyń elektrondyq nusqasy qajet bolýy múmkin.
Jańa qyzmetti paıdalaný úshin:
- eGov Mobile mobıldi qosymshasyna kirip, avtorızatsııadan ótip, «Tsıfrlyq qujattar» bólimine ótý;
- «Otbasy» sanatynan qamqorshylyq nemese qorǵanshylyq týraly málimettermen tanysý;
- eger qujat kórsetilmese — «Qujattardy jańartý» batyrmasyn basý qajet.
Aıta keteıik, eGov Mobile mobıldi qosymshasynan endi turǵyn úı kezegi týraly bilýge bolady.
Sondaı-aq bıyldan bastap áskerı oqý oryndary eGov.kz portaly arqyly ótinim qabyldaı bastady.