eGov Mobile qosymshasynda múlikti erikti saqtandyrý servısi iske qosyldy
TAShKENT. KAZINFORM — eGov Mobile mobıldi qosymshasynda múlikti jáne azamattyq-quqyqtyq jaýapkershilikti erikti saqtandyrýdyń jańa tsıfrlyq servısi qoljetimdi boldy, dep habarlaıdy «Ulttyq aqparattyq tehnologııalar» aktsıonerlik qoǵamynyń baspasóz qyzmeti.
Joba «Ulttyq aqparattyq tehnologııalar» AQ men «Tumar» saqtandyrý brokeri» JShS birlesip iske asyrdy jáne azamattarǵa arnalǵan tsıfrlyq servıster aıasyn keńeıtýge baǵyttalǵan.
Jańa ónim paıdalanýshylarǵa turǵyn úı jyljymaıtyn múlkin jáne kórshiler aldyndaǵy jaýapkershilikti tolyqtaı onlaın formatta saqtandyrýǵa múmkindik beredi. Servıs turmysta jıi kezdesetin negizgi táýekelderdi, sonyń ishinde órtti, jarylysty jáne sý basý saldarynan keltirilgen zalaldy qamtıdy. Rásimdeý aı saıynǵy jazylý formaty boıynsha júzege asyrylady, bul qyzmetti ıkemdi ári qoljetimdi etedi.
- «Tumar Home» servısi endi eGov Mobile qosymshasynda qoljetimdi, osylaısha azamattar óz múlkiniń qorǵalýyn ózderi qamtamasyz ete alady. Saqtandyrýdy rásimdeý týraly sheshim paıdalanýshynyń óz erkinde, al «UAT» AQ komandasy seriktestermen birlesip servıstiń mobıldi qosymsha ekojúıesine yńǵaıly ári qaýipsiz ıntegratsııalanýyn qamtamasyz etti», – dedi «UAT» AQ basqarma tóraǵasy Daýlet Bekmanov.
«Tumar Home» servısin qalaı paıdalanýǵa bolady. Saqtandyrý polısin rásimdeý úshin paıdalanýshyǵa:
- eGov Mobile mobıldi qosymshasynda avtorızatsııadan ótý qajet;
- «Habarlamalar» – «Habarlandyrýlar» bólimine ótý kerek;
- «Tumar Home» saqtandyrýy týraly habarlandyrýdy tańdap, servısti ashý;
- derbes derekterdi óńdeýge kelisim berý;
- polısti rásimdeýge qajetti málimetterdi toltyrý;
- saqtandyrý jarnasyn tóleý qajet.
Saqtandyrýǵa jazylý quny aıyna 1 500 teńgeni quraıdy. Tólemderdiń jalpy somasy 500 000 teńgege deıin jetýi múmkin. Onyń ishinde 250 000 teńgege deıin múlikke keltirilgen zalaldy óteýge, al 250 000 teńgege deıin úshinshi tulǵalarǵa keltirilgen zııandy óteýge baǵyttalady.
Saqtandyrý ónimin iske asyrýǵa úsh saqtandyrý kompanııasy qatysady: Freedom Insurance, Basel jáne Alatau City Garant. Tańdalǵan saqtandyrý kompanııasyna qaramastan, paıdalanýshylar úshin saqtandyrý sharttary men polıs quny birdeı.
- Biz saqtandyrýdy tsıfrlyq yńǵaılylyqtyń jańa deńgeıine shyǵarǵanymyzǵa qýanyshtymyz. «Tumar Home» – eń jıi kezdesetin turmystyq táýekelderdi qamtıtyn qarapaıym, qoljetimdi ári tıimdi ónim. eGov Mobile-men ıntegratsııa paıdalanýshylardyń keń aýqymyn qamtýǵa jáne saqtandyrýdy birneshe qadam arqyly rásimdeýge múmkindik beredi», – dep atap ótti «Tumar» saqtandyrý brokeri» JShS ókilderi.
Qazirgi kezeńde servıs jyljymaıtyn múlikti endi rásimdegen paıdalanýshylarǵa qoljetimdi. Menshik quqyǵyn tirkeý rásimi aıaqtalǵannan keıin olar eGov Mobile qosymshasynda saqtandyrýdy rásimdeý týraly usynysy bar habarlandyrý alady.
Polısti rásimdeý nebári birneshe mınýtty alady jáne tolyqtaı tsıfrlyq formatta, ıaǵnı qaǵaz qujattarsyz júzege asyrylady, bul protsestiń qarapaıymdylyǵy men qaýipsizdigin qamtamasyz etedi. Servıs memlekettik elektrondyq qyzmetter ekojúıesine ıntegratsııalanǵan, bul azamattarǵa bir qosymsha arqyly múliktik jáne ákimshilik máselelerdi qatar basqarýǵa múmkindik beredi.
Osyǵan deıin «TsON» mobıldi qosymshasynda elektrondy senimhat rásimdeý boıynsha jańa servıs iske qosylǵany týraly jazdyq.