eGov Mobile-dyń «Zań men tártip» bólimi jańardy: azamattarǵa qandaı múmkindikter qoljetimdi
ASTANA. KAZINFORM — eGov Mobile mobıldi qosymshasynda «Zań men tártip» servısi aýqymdy jańartyldy. ndi ol quqyq qorǵaý salasyndaǵy memlekettik qyzmetterdi, tsıfrlyq servıster men aqparattyq materıaldardy biriktiretin biryńǵaı tsıfrlyq vıtrına retinde usynylady. Bul týraly «Ulttyq aqparattyq tehnologııalar» aktsıonerlik qoǵamy málim etti.
Jańartylǵan bólimderde paıdalanýshylarǵa memlekettik qyzmetter, derbes derekterdi qorǵaý jáne quqyq buzýshylyqtardyń aldyn alýǵa baǵyttalǵan servıster, sondaı-aq Qazaqstan Respýblıkasy Bas prokýratýrasynyń aqparattyq materıaldary men servısteri qoljetimdi.
Birinshi bólimde paıdalanýshylarǵa kelesi tsıfrlyq servıster usynylǵan:
- polıtsııa qyzmetterine júginýge arnalǵan «102» servısi. Ol arqyly oqıǵa, turmystyq zorlyq-zombylyq, jol-kólik oqıǵasy, jol qozǵalysy erejelerin buzý jáne basqa da jaǵdaılar týraly habarlaýǵa bolady;
- derbes derekterdiń taralyp ketkeni týraly faktilerdi tekserýge arnalǵan «Nomad Guard» servısi;
- taýarlardyń tańbalanýyn tekserýge arnalǵan «Naqty Onim» servısi;
- qaryzdar men mıkrokredıtterden bas tartý jáne basqa da tsıfrlyq sheshimder.
Atalǵan servısterdiń barlyǵy eGov Mobile qosymshasyndaǵy «Servıster» bóliminen shyǵarylyp, jańartylǵan «Zań jáne tártip» vıtrınasyna ornalastyryldy.
— «Ulttyq aqparattyq tehnologııalar» AQ komandasy tsıfrlyq servıster men memlekettik qyzmetterdi turaqty túrde jetildirip, olardy azamattarǵa barynsha yńǵaıly, qoljetimdi ári olardyń qajettilikterine baǵdarlanǵan etý baǵytynda jumys istep keledi. «Zań men tártip» servısiniń QR Bas prokýratýrasy, Іshki ister mınıstirligimen birlesip iske asyrylǵan jańartylýy osy jumystyń kelesi kezeńi boldy. Servıs 2025 jylǵy maýsym aıynda iske qosyldy jáne sol ýaqyttan beri shamamen 1,4 mln ret paıdalandy. Bul onyń suranysqa ıe ekenin jáne mańyzdylyǵyn kórsetedi, — dep atap ótti «Ulttyq aqparattyq tehnologııalar» AQ Basqarma tóraǵasy Dáýlet Bekmanov.
Budan ári quqyq qorǵaý qyzmeti salasyndaǵy eń kóp suranysqa ıe memlekettik qyzmetter usynylǵan. Olardyń qatarynda sottylyqtyń bolýy nemese bolmaýy týraly anyqtama alý, shetelge shyǵýǵa tyıym salynǵanyn tekserý, adamnyń sybaılas jemqorlyq qylmysyn jasaǵany týraly málimetter berý, ákimshilik aıyppuldardy izdeý jáne tóleý jáne t. b. bar.
Jeke bólim Qazaqstan Respýblıkasy Bas prokýratýrasynyń aqparattyq materıaldary men tsıfrlyq servısterin qamtıdy. Bólimde quqyqtyq statıstıkaǵa qatysty materıaldar, habar-osharsyz ketken adamdardy izdeý servısi, quqyq buzýshylyq týraly aryzdyń tirkelgenin tekserýge arnalǵan servıs jáne basqa da aqparattyq quraldar ornalastyrylǵan.
«Zań men tártip» qaǵıdaty Memleket basshysy tarapynan strategııalyq baǵyt retinde aıqyndalǵan. Ony damytý maqsatynda Úkimet qaýlysymen 2025–2030 jyldarǵa arnalǵan qoǵamda zań men tártip ıdeologııasyn ilgeriletý tujyrymdamasy bekitildi.
Jańartýlar QR Іshki ister mınıstrligi, QR Jasandy ıntellekt jáne tsıfrlyq damý mınıstrliginiń Memlekettik kórsetiletin qyzmetter komıteti, «Ulttyq aqparattyq tehnologııalar» AQ jáne QR Bas prokýratýrasynyń birlesken jumysynyń arqasynda iske asyryldy.
Aıta keteıik, Qazaqstandyqtardyń 76,8%-y «Zań men Tártip» qaǵıdatyn qoldaıdy.
