EGov.kz jyljymaıtyn múlik pen jerge qatysty qyzmetterdi ýaqytsha toqtatty

ASTANA. QazAqparat – EGov.kz portaly jyljymaıtyn múlik pen jerge qatysty qyzmetterin ýaqytsha toqtatty, dep habarlaıdy QazAqparat tilshisi.

BAQ ókilderiniń qatysýymen ótken baspasóz maslıhatynda Tsıfrlyq damý jáne aeroǵarysh ónerkásibi vıtse-mınıstri Áset Turysov bazany biriktirýge baılanysty úsh kún boıy EGov.kz portalynyń keıbir qyzmetteri qoljetimsiz bolatynyn málim etti.

«16-18 maýsym aralyǵynda jyljymaıtyn múlik pen jerge qatysty qyzmetter kórsetilmeıdi. Biz bul aralyqta jer jáne jyljymaıtyn múlik boıynsha derekter bazasyn biriktiremiz», - dedi Áset Turysov vedomstvoda ótken brıfıngide.

Spıkerdiń sózinshe, Tsıfrlyq damý, Aýyl sharýashylyǵy jáne Ádilet mınıstrlikteri birlesip, jer jáne jyljymaıtyn múlik boıynsha biryńǵaı ashyq derekter bazasyn jasaqtaǵan. Ol «Jyljymaıtyn múliktiń biryńǵaı memlekettik kadastry» jańa aqparattyq júıesine kóshý úshin qurastyryldy.

Osyǵan baılanysty 16-18 maýsym aralyǵynda derekterdi jańa aqparattyq júıege kóshirý josparlanǵan.