eGov.kz portalynda jańa qyzmet túri paıda boldy

ASTANA. QazAqparat - eGov.kz portalynda barlyq salyqtar men basqa da mindetti tólemderdi avtorızatsııasyz, elektrondy tsıfrlyq qoltańbamen qol qoımaı-aq tóleý qyzmeti iske qosyldy, dep habarlaıdy QazAqparat vedomstvonyń baspasóz qyzmetine silteme jasap.

eGov.kz portalynda «Salyqtar jáne qarjylar» - «Salyq salý» - «Salyqtardy jáne bıýdjetke tólenetin basqa da mindetti tólemderdi tóleý» jáne «Onlaın resimdeý» batyrmasyn basyp, qyzmetke tapsyrys berýge bolady.

Salyq tóleýshiniń JSN/BSN, memlekettik kirister organynyń ataýyn, tólem somasyn, bıýdjettik synyptamasynyń kodyn tańdaǵannan keıin júıe salyq tóleý bólimine ótýdi avtomatty túrde usynady. Barlyq protsedýra aıaqtalǵannan keıin tólem jasalǵanyn rastaıtyn elektrondy chek beriledi.

Salyq tóleýshi jeke tulǵa retinde avtorızatsııalanyp, zańdy tulǵanyń BSN derekterin toltyra otyryp, zańdy tulǵa úshin salyqtarda tóleý múmkindigine ıe bolady jáne kerisinshe zańdy tulǵa jeke tulǵanyń salyqtaryn tóleı alady.

Osyǵan deıin «Elektrondy úkimet» portalynda jeke tulǵalar úshin salyqtyń úsh túri: múlik salyǵy, kólik quraldaryna salynatyn salyq, jer salyǵy boıynsha tóleý múmkindigi bolatyn.

Búgingi kúni portalda 18 salyq túri boıynsha tólemder jasaýǵa múmkindik berilip otyr:

- korporatıvtik tabys salyǵy;

- jeke tabys salyǵy;

- áleýmettik salyq;

- zańdy tulǵalardyń jáne dara kásipkerlerdiń múligine salynatyn salyqtar;

- jer salyǵy;

- zańdy tulǵanyń kólik quraldaryna salynatyn salyq;

- biryńǵaı jer salyǵy;

- qosylǵan qun salyǵy;

- aktsızder;

- arnaıy tólemder jáne jer qoınaýyn paıdalanýshylar salyǵy;

- eksportqa salynatyn renta salyǵy;

- oıyn bıznesine salyq;

- tirkelgen salyq;

- alymdar;

- tólemder;

- kedendik tólemder;

- basqa tólemder jáne bajdar.

Osyǵan uqsas qyzmet túri 2018 jyldyń sońyna deıin QR QM Memlekettik kirister komıtetiniń kgd.gov.kz portalynda da júzege asyrylady.