Egov.kz portalynda sportshylar men olardyń ata-analaryna arnalǵan jańa qyzmet túri paıda boldy

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń «Ulttyq aqparattyq tehnologııalar» AQ bolashaq sportshylardy tárbıeleıtin ata-analarǵa yńǵaıly bolý úshin eGov.kz-te onlaın qyzmetterdi engizý boıynsha jumystar júrgizdi, dep habarlaıdy QazAqparat «Ulttyq aqparattyq tehnologııalar» AQ baspasóz qyzmetine silteme jasap.

Buryn sportshylarǵa arnalǵan mamandandyrylǵan mekemelerge túsý úshin qujattardy qaǵaz túrinde, sonyń ishinde ótinishti, marapattardy, sporttaǵy jetistikterdi rastaıtyn buıryqtardy, sondaı-aq anyqtamalardy ózimen alyp, oqý oryndaryna júginý qajet bolatyn. Endi ótinishti úıden shyqpaı-aq, egov.kz-te anketany toltyryp, barlyq qajetti qujattardy qosa tirkeý arqyly onlaın túrde berýge bolady. Qyzmetke ETsQ arqyly ata-ana, balanyń zańdy ókili nemese 18 jasqa tolǵan oqýǵa túsýshiniń ózi tapsyrys bere alady.

Ótinish berý úshin «elektrondyq úkimettiń» egov.kz portalynda mynalardy oryndaý qajet:

- «Týrızm jáne sport» bólimin tańdap, «Halyq úshin sport» qosymsha betine ótip, «Olımpıadalyq rezervtiń respýblıkalyq mamandandyrylǵan mektep-ınternat-kolledjderine jáne sportta daryndy balalarǵa arnalǵan oblystyq mektep-ınternattarǵa qujattar qabyldaý» qyzmeti degen belgini basý;

- qajetti jerlerdi toltyrý;

- qujattardy pdf, jpeg, jpg formatynda tirkeý;

- sms-parol nemese ETsQ arqyly suraý salýǵa qol qoıý.

Suraý salý sátti óńdelgen jaǵdaıda memlekettik organnan jeke kabınetke ótinim oryndalǵany týraly habarlama kelip túsedi.

Eske sala keteıik, búgingi kúni eGov.kz portalynda týrızm jáne sport salasyndaǵy 10-ǵa jýyq qyzmet qoljetimdi, onyń ishinde: sporttyq ataqtar men sanattar berý, jergilikti sport federatsııalaryn akkredıtteý, sportshylar men jattyqtyrýshylarǵa ómir boıy aı saıynǵy materıaldyq qamsyzdandyrýdy tóleý jáne basqalar.