Egov.kz portalynda keńesterdi vıdeo arqyly alýǵa bolady
Vıdeo arqyly keńes berýshi mamannyń kómegin alý úshin paıdalanýshy basty bettiń oń jaq tómengi buryshyndaǵy «Vırtýaldy assıstent» túımesin basýy kerek. Ashylǵan terezede beınekamera belgisin tańdaý qajet. Júıe paıdalanýshydan beınekamera men mıkrofonnyń qosylýyna ruqsat suraıdy. Birneshe sekýnd ishinde HQO operatory klıentpen baılanysqa shyǵady. Ekrandaǵy áreketti kórsetý úshin qyzmet alýshy «Ekran demonstratsııasy» túımesin, sodan keıin «Bólisý» batyrmasyn basýy kerek.
Osylaısha, HQO operatory abonenttiń monıtoryn kóre alady jáne oǵan egov.kz portalynda kez kelgen qyzmetti, onyń ishinde ETsQ-ny qashyqtan rásimdeýge kómektesip, mobıldi azamattar bazasyna tirkeı alady.
«Azamattarǵa arnalǵan úkimet» memlekettik korporatsııasynyń basqarma tóraıymy Ásemgúl Baltashevanyń aıtýynsha, ekrandy «bólisý» servısi operator men klıenttiń arasyndaǵy baılanysty aıtarlyqtaı jeńildetti, óıtkeni qyzmetterdi usyný protsesinde 1414 telefony arqyly keńes berý tıimdi bolǵanymen, qashanda yńǵaıly bola bermeıdi. «Buryn bizdiń operatorlar klıentten qaı siltemeni, qaı bólim men qyzmetti ashqanyn únemi surap otyratyn. Endi biz ekranda bolyp jatqan barlyq áreketti kóre alamyz jáne klıentti qandaıda bir qyzmetti alý joldary boıynsha birden baǵyttaı alamyz. Bul servıs azamattarymyzdyń tsıfrlyq saýatyn qashyqtan arttyrýǵa da múmkindik beredi», – dedi ol.
Esterińizge sala keteıik, koronavırýs ınfektsııasynyń taralý qaýipiniń saqtalýyna baılanysty, HQO arqyly tek «qaǵaz» júzinde kórsetiletin qyzmetterdi alýǵa bolady. Egov.kz portaly arqyly qoljetimdi qyzmetterdi úıden nemese ákimdikterde, bilim berý jáne medıtsına uıymdarynda t.s.s. jerlerde ornalasatyn ózine-ózi qyzmet kórsetý sektorlarynda alý kerek. Memlekettik qyzmetterdi elektrondy túrde alý boıynsha egov.kz portalyndaǵy vırtýaldy assıstent keńesshileri jáne 1414 biryńǵaı baılanys ortalyǵynyń mamandary kómektese alady.
Aıta keteıik, qazirgi ýaqytta Qazaqstanda memlekettik qyzmetterdiń 80%-dan astamy elektrondy formatta qoljetimdi.
