«eGov qyzmetkerimin» degen alaıaqtar halyqty nesıe rásimdeýge kóndirip jatyr
ASTANA. KAZINFORM — Qazaqstanda alaıaqtar ózderin eGov qyzmetkerleri retinde tanystyryp, azamattardy aldaýdyń jańa tásiline kóshti. Keıingi bir aıda osyndaı 30-ǵa jýyq jaǵdaı tirkelgen.
Bas prokýratýranyń habarlaýynsha, ádette alaıaqtar azamattarǵa olardyń atyna elektrondyq tsıfrlyq qoltańba (ETsQ) rásimdelgenin nemese basqa da zańsyz áreketter jasalǵanyn aıtyp qońyraý shalady.
Odan keıin áńgimege olardyń sybaılastary qosylyp, zańsyz nesıe rásimdeýdiń aldyn alý úshin aqshany ózderi kórsetken shotqa aýdarýdy usynady.
— Mundaı jaǵdaıdyń biri Tarazda bolǵan. Áıelge beıtanys adam qońyraý shalyp, ózin eGov qyzmetkeri retinde tanystyrǵan jáne onyń atyna ETsQ shyǵarylǵanyn aıtqan. Keıin WhatsApp arqyly basqa adamdar habarlasyp, onyń atyna jeti bankten nesıe rásimdelgenin jetkizgen. Alaıaqtardyń sózine sengen áıel úshinshi tulǵalardyń shottaryna 2 mln teńgeden astam aqsha aýdarǵan. Bul fakti boıynsha sotqa deıingi tergeý júrgizilip jatyr, — delingen habarlamada.
Bas prokýratýranyń málimetinshe, ınternet-alaıaqtyq faktileriniń sany 14,8% azaıyp, 17,2 myńnan 14,6 myńǵa deıin tómendegen. Alaıda qylmyskerler azamattardy aldaýdyń jańa tásilderin qoldanýyn jalǵastyryp otyr.
Vedomstvo memlekettik organdar men servısterdiń qyzmetkerleri telefon arqyly aqsha aýdarýdy, nesıe rásimdeýdi nemese qarajatty «qaýipsiz shottarǵa» aýdarýdy talap etpeıtinin eske saldy.
Sondaı-aq azamattarǵa bógde adamdarǵa SMS-kodtardy, qupııasózderdi, bank kartalary men ETsQ derekterin bermeýge jáne beıtanys adamdardyń nusqaýy boıynsha aqsha aýdarmaýǵa keńes berildi.
Kúdikti qońyraý túsken jaǵdaıda áńgimeni dereý toqtatyp, memlekettik organǵa nemese bankke resmı baılanys arnalary arqyly ózińiz habarlasý qajet.
Eske salaıyq, buǵan deıin Astanada azamattardyń derbes derekteri men bank qarajatyn ıemdenýge baǵyttalǵan aýqymdy fıshıngtik shema áshkerelengenin habarlaǵanbyz. Qylmystyq top tórt kún ishinde Beeline, Kcell jáne Activ abonentterine shamamen 150 myń jalǵan SMS-habarlama jibergen.
