eGov, e-Otinish qyzmetteri men Aitu messendjeri tarıfsiz qoljetimdi bolady
ASTANA. KAZINFORM – Májilis telekommýnıkatsııalar naryǵyn jáne derekterdi óńdeý ortalyqtaryn damytý máseleleri boıynsha ózgerister men tolyqtyrýlar engizý týraly zań jobasyn birinshi oqylymda maquldady. Zań jobasy 116 túzetýden turady jáne baılanys qyzmetteriniń sapasy men qoljetimdigin arttyrý, telekommýnıkatsııa ınfraqurylymyn damytý, baılanys jelilerindegi alaıaqtyqpen kúresý baǵyttaryn qamtıdy.
– Birinshi blokta áleýmettik mańyzy bar memlekettik servısterge trafıgi eseptelmeıtin, ıaǵnı tarıfsiz qoljetimdilik engizý qarastyrylǵan. Bul azamattarǵa balans nól bolsa da, negizgi memlekettik servısterdi paıdalanýǵa múmkindik beredi. Mysaly, eGov, e-Otinish, Aitu ulttyq messendjeri jəne ózge de qosymshalar. Oǵan qosa, tótenshe jaǵdaıda jedel áreket etý úshin «112» qyzmetine adamnyń ornalasqan jerin aıqyndaý múmkindigi óteýsiz berilmek, - dedi Premer-Mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev jańa zań tanystyrylymynda.
Baılanys operatorlary jumysynyń ashyqtyǵyn arttyrý boıynsha normalar kózdelgen. Operatorlar qarjylyq eseptilikti, sondaı-aq ınfraqurylymǵa qol jetkizý tarıfterin jarııalaıtyn bolady.
Baılanys sapasyn jaqsartý úshin uıaly baılanys sıgnalynyń kúsheıtkishteri – ıaǵnı repıterlerdi ákelýge shekteýler engiziledi. Endi olardy tek baılanys operatorlary ǵana ákele alady. Bul jelige kedergi keltiretin sertıfıkattalmaǵan quraldardy shekteıdi.
Sondaı-aq baılanys ınfraqurylymyn salý úshin jer ýchaskelerin bólý tártibi jeńildetiledi. Egjeı-tegjeıli josparǵa nemese bas josparǵa mindetti túrde engizbeı-aq jer berý tetikteri ońtaılandyrylady. Erekshe qorǵalatyn tabıǵı aýmaqtarda baılanys jelilerin salý múmkindigi kózdeledi. Bul shalǵaı, aýyldyq jáne týrıstik aımaqtarda ınternetpen qamtýdy keńeıtýge kómektesedi.
Ekinshi blok telekom-ınfraqurylymdy damytýǵa baǵyttalǵan. Radıojıilik spektrin paıdalanýǵa beriletin ruqsatqa merzim engiziledi. Bul jıilikterdi tıimdi bólýge jáne bos turyp qalýyn boldyrmaýǵa múmkindik beredi. Sondaı-aq, Internet jelileri jáne Internetke symsyz turaqty qoljetimdilik sııaqty jańa tehnologııalar úshin quqyqtyq negiz qalyptasady.
Vırtýaldy operatorlardyń jumys sharttary men spýtnıktik baılanys júıelerin paıdalaný talaptary jańartylady. Bul jańa spýtnık júıelerin keńirek engizýge, shalǵaı jerlerde ınternetti jaqsartýǵa jáne spýtnıktik baılanysta básekeni kúsheıtýge jol ashady.
– Bul túzetýlerdi Halyqaralyq elektrbaılanys odaǵynyń sarapshylary oń atap ótip, qabyldanyp jatqan sharalardyń biregeıligi men mańyzdylyǵyn atap ótti. Sondaı-aq halyqaralyq tranzıttik ınternet trafıktiń kedergisiz ótýi zań júzinde bekitiledi. Bul Qazaqstannyń óńirlik tsıfrlyq hab retindegi rólin kúsheıtedi, - dedi Jaslan Mádıev.
Aıta keteıik, Qazaqstanda poıyzdar men ushaqtarda ınternet qoljetimdi bolady.
