eGov buzylmady: Mınıstrlik 15 mln adamnyń deregi tarady degen aqparatqa núkte qoıdy
ASTANA. KAZINFORM — Búgin aqparat keńistiginde eGov júıesi buzylyp, Qazaqstannyń 15 mıllıon azamatynyń derekteri tarady degen aqparat shyndyqqa sáıkes kelmeıdi, dep habarlaıdy QR Jasandy ıntellekt jáne tsıfrlyq damý mınıstrliginiń baspasóz qyzmeti.
Mınıstrlik ýákiletti organdarmen birlesip tehnıkalyq tekserý júrgizdi. Vedomstvo málimetinshe, eGov aqparattyq júıeleriniń buzylǵany anyqtalǵan joq.
— Sonymen qatar, biz darknet-te satylymǵa shyǵarylǵan faıldarǵa qol jetkizdik. Olardy taldaý barysynda bul ártúrli belgisiz faıldar men sýretterdiń jıyntyǵy ekeni anyqtaldy. Jáne EGov júıesinen alynǵan derekter bazasynyń kóshirmesi emestigi belgili boldy. Muny rastaıtyn basqa da faktiler bar. Atap aıtqanda, jarııalanǵan derekter massıviniń kólemi men mazmuny bir-birine sáıkes kelmeıdi. Budan bólek, eGov júıelerinde habarlandyrý avtory kórsetkendeı, pasporttardyń skan-kóshirmeleri saqtalatyn baza joq. Tsıfrlyq qujattar múldem basqa tásilmen qalyptastyrylady jáne saqtalady. Sondyqtan taǵy da resmı túrde málimdeımiz: eGov júıesi buzylǵan joq. 15 mıllıon Qazaqstan azamatynyń derekteri eGov júıelerinen alyndy degen aqparat shyndyqqa sáıkes kelmeıdi, — delingen resmı aqparatta.
Vedomstvo atap ótkendeı, Darknet-tegi anonımdi habarlandyrýdyń ózi júıeniń buzylǵanyn nemese derekterdiń taraǵanyn dáleldemeıdi.
— Mıllıondaǵan azamattyń derbes derekteri týraly sóz bolǵan jaǵdaıda, aqparatty belgilengen fakt retinde taratpas buryn, eń aldymen onyń shynaıylyǵyn muqııat tekserip alǵan durys, — dep túıindedi Jasandy ıntellekt jáne tsıfrlyq damý mınıstrligi.
Buǵan deıin mınıstrlik beıindi qyzmettermen birlesip jarııalanǵan aqparatqa tehnıkalyq tekserý júrgizilip jatqanyn habarlaǵan edi.
