eGov arqyly bir aıda 6 myńnan astam adam emhanalarǵa tirkelgen

ASTANA. QazAqparat -  «Emhanaǵa tirkel de, mindetti áleýmettik memlekettik saqtandyrý júıesindegi óz mártebeńdi anyqta!» naýqanynyń alǵashqy aıynda eGov portaly arqyly 6 654 adam tirkeldi, dep habarlaıdy «QazAqparat» HAA tilshisi «Ulttyq aqparattyq tehnologııalar» AQ baspasóz qyzmetine silteme jasap.

2017 jyldyń alǵashqy toqsanynda 19 myńnan astam turǵyn emhanaǵa onlaın-tirkeý qyzmetin paıdalanǵan.

Eske sala ketsek, 5 sáýirden bastalǵan halyqty emhanalarǵa tirkeý naýqany 2017 jyldyń 30 maýsymyna deıin jalǵasady. Atalǵan jumys mindetti áleýmettik medıtsınalyq saqtandyrý júıesin engizý aıasynda júrgizilip jatyr. Emhanaǵa tirkelý ádisteriniń biri - elektrondy úkimet portalyndaǵy onlaın-qyzmetti paıdalaný. Bul rette elektrondy-sandyq qoltańba talap etilmeıdi.

Onlaın qyzmetti paıdalaný úshin eGov.kz portalyna tirkelip, «Densaýlyq saqtaý» bólimine ótý qajet. Keıin «Bastapqy medıko-sanıtarlyq kómek kórsetetin medıtsınalyq mekemege tirkelý» qyzmetin tańdaısyz. Odan ári «Onlaın-qyzmetke tapsyrys berý» batyrmasyn basyp, azamat týraly málimetterdi kórsete otyryp, ótinishti jiberý kerek.

Emhanada jaýapty qyzmetker ótinishti qabyldaıdy jáne tirkeý týraly talon daıyndaıdy. Bul qyzmet tegin kórsetiledi jáne ony kórsetý merzimi - 1 jumys kúni. Qyzmet kórsetý ýaqyty belgilengen merzimnen asyp ketken jaǵdaıda, tirkeý týraly ótinish jiberilgen medıtsınalyq uıymǵa habarlasý kerek.

«Bastapqy medıko-sanıtarlyq kómek kórsetetin medıtsınalyq mekemege tirkelý» qyzmeti 2013 jyly elektrondy úkimet portalynda iske qosyldy. Bul qyzmet barlyq óńirlerge qoljetimdi. 2016 jyly eGov.kz portalynyń emhanaǵa tirkeý qyzmetin 24 173 adam paıdalanǵan.