eGov arqyly ótinish berý kómek alýǵa kepildik emes — mınıstrlik

ASTANA. KAZINFORM — Áleýmettik jelilerde jáne jekelegen buqaralyq aqparat quraldarynda ótinish bergen barlyq azamattarǵa áleýmettik kómek avtomatty túrde taǵaıyndalady degen aqparat tarady. Qazaqstan Respýblıkasy Eńbek jáne halyqty áleýmettik qorǵaý mınıstrligi bul aqparattyń shyndyqqa saı kelmeıtinin aıtyp, túsinikteme berdi.

Vedomstvonyń málimetinshe, áleýmettik kómek — memlekettiń ataýly qoldaý sharasy bolyp tabylady jáne belgilengen muqtajdyq krıterıılerine sáıkes keletin, qıyn ómirlik jaǵdaıǵa tap bolǵan azamattarǵa ǵana kórsetiledi.

— Kómek taǵaıyndaý qoldanystaǵy zańnamada jáne máslıhattardyń sheshimderinde aıqyndalǵan negizder boıynsha júzege asyrylady, belgilengen talaptarǵa sáıkestigi qujat júzinde rastalǵan jaǵdaıda ǵana múmkin bolady, — delingen habarlamada.

eGov portaly arqyly ótinish berý — áleýmettik kómekke júginýdiń bir tásili ǵana jáne onyń avtomatty túrde taǵaıyndalýyna kepildik bermeıdi.

Kómek alýshy sanattardyń tizbesi, kómekti kórsetý sharttary jáne qajetti qujattar tizimi ár óńirde máslıhattar tarapynan jeke-jeke bekitiledi jáne jergilikti atqarýshy organdardyń resmı ınternet-resýrstarynda ornalastyrylady.

Barlyq túsken ótinishter jergilikti atqarýshy organdarda belgilengen tártippen qaralady.

— Azamattardy aqparatty tek resmı derekkózderden alýǵa shaqyramyz. Jalǵan aqparat taratý zań boıynsha jaýapkershilikke tartylatynyn eske salamyz, — dep esmkertti mınıstrlikten.

Eske sala keteıik, buǵan deıin Almatyda jańa Konstıtýtsııaǵa qatysty feık taratqan turǵyn jazalanǵan bolatyn.