eGov arqyly kedergi keltirgen kólik ıelerine anonımdi habarlama jiberýge bolady

ASTANA. KAZINFORM — eGov Mobile qosymshasynda kólik ıesine anonımdi habarlama jiberetin jańa qyzmet túri qosyldy. Bul týraly QR tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev aıtyp berdi.

Bul joba QR Іshki ister mınıstrligimen birlesip júzege asyrylǵan.

— Búginnen bastap taǵy bir tsıfrlyq múmkindik iske qosyldy — kólik ıelerine habarlama jiberý servısi. Eger siz terezesi ashyq qalǵan nemese ótýge kedergi keltirip turǵan kólikti baıqasańyz, memlekettik nómirdi terip, jaǵdaıdy tańdasańyz jetkilikti. Kólik ıesine anonımdi habarlama jiberiledi. Bul servıs ózara kómektesý men azamattyq jaýapkershiliktiń quralyna aınalady dep senemiz, — dedi mınıstr Úkimettiń búgingi otyrysynda.

Mobıldi qosymshada kólikke qatysty «Joldy bógep tur», «Jaryǵy janyp tur», «Dóńgelegi jarylǵan», «Terezesi ashyq», «Sıgnalızatsııa qosyldy» degen nusqalardyń birin tańdaýǵa bolady. Sodan keıin kóliktiń memlekettik tirkeý nómirin kórsetý qajet.

Aıta keteıik, ótken jyly Qazaqstanda memlekettik qyzmettiń 91% onlaın kórsetilgen. «Ulttyq qor — balalarǵa», «Stop-kredıt», «Kólik ıelený tarıhy», «Qumar oıyndarǵa qatysýdan erikti túrde bas tartý» sekildi tanymal servıster iske qosylǵan.