Jańartylǵan eGov 3.0 portaly iske qosyldy
ASTANA. KAZINFORM — Úkimet otyrysynda QR Premer-mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev QazTech platformasynda ázirlengen zamanaýı eGov 3.0 portaly iske qosylǵanyn málimdedi.
Onyń sózinshe, atalǵan portal memlekettik qyzmet kórsetýdi ońtaılandyrýǵa, artyq talaptardy boldyrmaýǵa jáne ınfraqurylymǵa júktemeni azaıtýǵa múmkindik berdi.
— eGov portaly da óziniń tehnologııalyq múmkindiginiń sheginde jumys istep keldi. Osyǵan baılanysty jaqynda QazTech platformasynda ázirlengen zamanaýı eGov 3.0 portaly iske qosyldy. Qyzmetter barynsha ońaı, paıdalanýshy úshin yńǵaıly formatta jınaqtaldy. Talaptar men qadamdar sany azaıdy. Suranysqa ıe qyzmetterdiń bir bóligi jańa formatta qoljetimdi, — dedi Jaslan Mádıev.
Sonymen birge, portalda keri baılanys nysany iske qosyldy. Onda árbir paıdalanýshy qyzmetterdi odan saıyn yńǵaıly qylý jóninde óz usynysyn jetkize alady.
— Barlyq qazaqstandyqty belsendi qatysýǵa shaqyramyz. Úzdik usynystar portaldy odan ári jańǵyrtý barysynda eskeriledi. Jumys ári qaraı jalǵasady, — dep úndeý jasady mınıstr.
Aıta keteıik, buǵan deıin barlyq memlekettik organ QazTech platformasymen jumys isteıtinin jazǵanbyz.
