Eginshilerge ózekti meteorologııalyq boljamdardy ýaqtyly berý qajet – Úkimet basshysy
ASTANA. KAZINFORM – Búgin Úkimet otyrysynda Premer-mınıstri Oljas Bektenov aýa raıy jaǵdaılaryna monıtorıng júrgizýge erekshe nazar aýdarýdy tapsyrdy.
- Aýa raıy jaǵdaılaryna monıtorıng júrgizýge erekshe nazar aýdarǵan jón. Ekologııa mınıstrligi jedel sheshimder qabyldaý úshin eginshilerge ózekti meteorologııalyq boljamdardy ýaqtyly berýdi qamtamasyz etsin. Sońǵy 3 jylda fermerler 70 myńǵa jýyq jańa tehnıka satyp aldy, onyń 90 paıyzy ózimizdiń otandyq óndiristen shyqqan. Aýyl sharýashylyǵy, Ónerkásip mınıstrlikteri men «Báıterek» holdıngi jańa tehnıkanyń úlesin arttyrý jumysyn jalǵastyrsyn, - dedi Úkimet basshysy.
Onyń aıtýynsha, ónim túrleri men kólemin ulǵaıtý úshin otandyq mashına jasaýshylardy ári qaraı da belsendi yntalandyrý qajet.
- Jýyrda biz aýyl sharýashylyǵy tehnıkasyn shyǵaratyn jetekshi álemdik kompanııalarmen kooperatsııany tereńdetý, óndiristi lokalızatsııalaý deńgeıin arttyrý jáne zamanaýı agrotehnologııalardy engizý boıynsha kelisimge qol qoıdyq. Barlyq jaýapty memlekettik organdar men ákimdikter qol jetkizilgen ýaǵdalastyqtardy júzege asyrýǵa jan-jaqty qoldaý kórsetsin, - dedi ol.
Oljas Bektenov Memleket basshysy Qazaqstan halqyna Joldaýynda salany tsıfrlandyrýǵa basa nazar aýdarǵanyn eske saldy.
- Tsıfrlyq quraldar agrarlyq óndiristiń barlyq kezeńinde, ıaǵnı protsesterdi josparlaý men baqylaýdan bastap daıyn ónimdi esepke alý men satýǵa deıin qoldanylýǵa tıis. Biz aýyl sharýashylyǵy óndirisinde tsıfrlyq sheshimder men jasandy ıntellektini tabysty qoldaný mysaldaryn buǵan deıin de qaraǵan bolatynbyz. Osyndaı bastamalar men tájirıbeni odan ári keńinen taratý qajet. Eleýli jer resýrstaryna ıe sharýashylyqtardyń áleýetin tolyq jumyldyrý kerek. Jalpy sońǵy jyldary ósimdik sharýashylyǵy ornyqty ósim kórsetip keledi. Bizdiń mindetimiz – osy qarqyndy saqtap qalý, - dedi Premer-mınıstr.
Aıta keteıik, Úkimet otyrysynda kóktemgi dala jumystarynyń barysy talqyǵa salynyp jatyr.
