Egindi erterek bastaý kerek – mınıstr qurǵaqshylyq bolýy múmkin óńirlerdi atady
ASTANA. KAZINFORM – Ekologııa jáne tabıǵı resýrstar mınıstri Erlan Nysanbaev aýa raıy boljamdaryn baıandap, qurǵaqshylyq bolýy múmkin óńirlerdi atady jáne egin egý jumystaryn erterek bastaýdy usyndy.
Mınıstrdiń aıtýynsha, bıyl eldiń kóp bóliginde qys jyly jáne qarly bolyp, topyraqtyń jaqsy ylǵaldanýyna áser etti.
− Eldiń soltústigi men ortalyǵynyń egis alqaptarynda ylǵal qory negizinen qanaǵattanarlyq jáne ońtaıly. Alaıda, sáýirdegi ystyq aýa raıynda ylǵal tez býlandy. Endi egis kezinde Batys Qazaqstan oblysynda topyraq ylǵaly jetispeýi múmkin. Astyq egetin aımaqtarda egin egý jumystaryn merzimnen erterek júrgizýdi usynamyz, − dedi E. Nysanbaev búgingi Úkimet otyrysynda.
Mamyr aıy eldiń kóp bóliginde ystyq jáne qurǵaq bolady dep kútilýde, alaıda astyq egetin óńirlerde, taý bókterinde jáne ońtústikte jaýyn-shashyn kólemi klımattyq normaǵa jaqyn mólsherde bolady dep boljanyp otyr.
Sondaı-aq, mamyrda Qostanaı oblysynyń ońtústiginde, Batys Qazaqstan jáne Mańǵystaý oblystarynyń ońtústik-batys bóliginde, Qyzylorda oblysynyń soltústik-batysynda, Almaty jáne Jambyl oblystarynyń soltústiginde, Qaraǵandy oblysynyń ońtústiginde, sondaı-aq Aqtóbe, Atyraý, Abaı jáne Túrkistan oblystarynyń jekelegen aýdandarynda qurǵaqshylyq bolýy múmkin.
− Maýsym aıynda Qazaqstannyń basym bóliginde aılyq ortasha aýa temperatýrasy qalypty bolady, ıaǵnı eldiń soltústigi men ortalyǵynda 17-20 gradýs, al batysynda – 23-25 gradýs bolady dep kútiledi. Ońtústik-batysta jáne ońtústikte ádettegiden ystyǵyraq bolady, jazyq bólikte ortasha temperatýra 24-28 gradýs, al maksımaldy temperatýra – 45 gradýsqa deıin jetedi. Eldiń batysynda jáne soltústik-shyǵysynda, shyǵysynda jáne ońtústiginde jaýyn-shashyn norma sheginde, al qalǵan aýmaqta kóbinese normadan az bolady, − dedi Ekologııa mınıstri.
Jaýyn-shashyn negizinen kópjyldyq normalar sheginde boljanady, soltústik-batysta, soltústikte, ońtústikte jáne ońtústik-shyǵysta jaýyn-shashyn normadan joǵary bolady dep boljanǵan.
− Tamyz, qyrkúıek aılary eginniń pisýi men ony jınaý jumystaryna qolaıly bolady dep kútilýde. Mol jáne uzaqqa sozylatyn jaýyn-shashyn kútilmeıdi, eldiń basym bóliginde aılyq ortasha aýa temperatýrasy klımattyq normadan 1 gradýsqa joǵary bolady, − dedi Erlan Nysanbaev.
Aıta keteıik, Energetıka mınıstrligi bıylǵy egis naýqanyna 401 myń tonna arzandatylǵan dızel otynyn bóldi. Sharýalar úshin túpkilikti baǵa lıtrine 254 teńgege beriledi, bul naryqtan 20%-ǵa arzan.