Egin jumystaryna úshinshi jyl qatarynan qomaqty qarjy bólindi — Úkimet

ASTANA. KAZINFORM — Úkimet kóktemgi egis jumystaryna daıyndyq barysyn pysyqtady. Premer-mınıstr Oljas Bektenov egis alqaptaryn ártaraptandyrýdy, naryqta suranysqa ıe daqyldardy kóbeıtip, tyńaıtqysh sebý josparyn jedeldetýdi tapsyrdy. 

— Egin egý jáne kúzgi jıyn-terim jumystaryn qarjylandyrý kólemin byltyrǵydaı 1 trln teńge deńgeıinde qaldyrdyq. Onyń ishinde tehnıkany lızıngke alýǵa 300 mlrd teńge qaralǵan. Memleket basshysynyń qoldaýynyń arqasynda úshinshi jyl qatarynan qomaqty qarjy bólinip jatyr. Fermerler úshin jeńildetilgen baǵamen 402 myń tonna janarmaı bólý kózdelgen, — dedi Oljas Bektenov búgingi Úkimet otyrysynda.

Premer memlekettik qoldaýdyń jaýapkershiligi joǵary ári jumysyna adal dıqandarǵa kórsetilýge tıis ekenin atap ótti. Ákimdikter bólingen qarajattyń tıimdi jumsalýyn turaqty baqylaýǵa alyp, ol úshin tsıfrlyq tehnologııalardy keńinen paıdalanǵany jón.

— Memleket basshysy jýyrda Úkimettiń keńeıtilgen otyrysynda tıisti tapsyrmalar berdi. Egis alqaptaryn ártaraptandyrý jumysyn bıyl da jalǵastyrý qajet. Kóbirek tabys ákeletin, ásirese eksportqa shyǵatyn jáne naryqta joǵary suranysqa ıe daqyldardyń egis alqaptaryn keńeıtýge erekshe nazar aýdarý kerek. Buǵan deıin sýdy kóp qajet etetin daqyldardyń úlesin qysqartýdy tapsyrdym. Endigi kezekte ozyq ǵylymı tásilderdi qoldanyp, qurǵaqshylyqqa tózimdi tehnologııalarǵa kóshý úshin óńirlerde túsindirý jumystaryn jalǵastyrý qajet, — dedi Úkimet basshysy.

Ózekti máseleniń biri — aýyl sharýashylyǵy tehnıkasynyń ázirligi. Ol búginge shamamen 80% bolyp otyr. Jappaı egis jumystary bastalǵansha bul kórsetkishti 100%-ǵa deıin jetkizý tapsyryldy.

Dıqandardy jetkilikti kólemde sapaly ári tekserilgen tuqymdarmen qamtamasyz etýge de erekshe nazar aýdaryldy. Bizdegi tabıǵı-klımattyq jaǵdaılarǵa beıimdelgen elıtalyq tuqymdar úlesin arttyrýǵa basymdyq berilýge tıis. Osy baǵytta otandyq tuqym óndirýshilerdi yntalandyrý sharalaryn qarastyrý qajettigi aıtyldy.

— Egin egýde agrotehnologııa talaptaryn qatań saqtap, tyńaıtqyshtardy ýaqytyly sebýdi jáne ósimdikterdi zııankesterden qorǵaý quraldaryn qoldanýdy qamtamasyz etińizder. Bul sharalar bolashaq ónimniń sapasy men tıimdiliginiń negizgi sharty sanalady. Bıyl tyńaıtqyshtar sebý jospary ǵylymı negizi bar normanyń 73%-nan astamyn nemese 2,3 mln tonna. Aýyl sharýashylyǵy jáne Ónerkásip mınıstrlikteri eginshilerdi qajetti kólemde sapaly ári qoljetimdi tyńaıtqyshtarmen qamtamasyz etýi qajet, — dedi Oljas Bektenov.

Buǵan deıin Energetıka mınıstri Erlan Aqkenjenov sharýalarǵa arnalǵan dızel naryqtaǵy baǵadan 15% arzan bolatynyn aıtqan edi.

Sonymen birge, Aýyl sharýashylyǵy mınıstri Aıdarbek Saparov elde aýyl sharýashylyǵy tehnıkasyn jańartý qarqyny qalaı júrip datqanyn baıandady.