Egin jınaý naýqany kezinde azyq-túlik taýarlary qoryn jasaqtap alý qajet – Premer
ASTANA. KAZINFORM – Úkimet otyrysynda Premer-mınıstr Oljas Bektenov egin jınaý naýqany kezinde azyq-túlik taýarlarynyń qoryn jasaqtap alý qajet ekenin aıtty.
- Aýyl sharýashylyǵy mınıstrligi óńir ákimdikterimen birlesip, elevatorlarda astyqtyń jańa túsimin ýaqytyly qabyldap, keptirýdi qamtamasyz etsin. Ónimdi saqtaý ınfraqurylymyn tolyq paıdalaný kerek. Astyqty, onyń ishinde jemis-jıdek pen kókónis ónimderin saqtaý boıynsha qyzmet kórsetý baǵasyn negizsiz ósirýge jol bermeńizder. Qajet bolǵan jaǵdaıda, bul jumysqa Básekelestikti qorǵaý jáne damytý agenttigin de tartqan jón, - dedi Úkimet basshysy.
Onyń aıtýynsha, Kólik mınıstrligi Qazaqstan temir joly kompanııasymen birge astyq tasymaldaıtyn vagondar men júk kólikteriniń jetkilikti kólemin qamtamasyz etýi tıis. Bul rette astyqty jınaý men tasymaldaý kestesin úılestirý úshin Aýyl sharýashylyǵy mınıstrligimen birge jumyla jumys isteý kerek.
- Egin jınaý naýqany kezinde azyq-túlik taýarlarynyń qoryn jasaqtap alý qajet. Óńir ákimdikteri kókónis ónimderiniń negizgi túrlerin qajetti kólemde jetkizý úshin qyrkúıek aıynyń sońyna deıin kelisimshart jasaýdy qamtamasyz etsin. Saýda mınıstrligi aýyl sharýashylyǵy ónimderine baǵa belgileý tizbeginde deldaldyq shemalarǵa qarsy sharalar qabyldap, astyqtyń fermerler úshin ádil sharttarmen satylymyn qamtamasyz etsin. Sonymen qatar negizgi azyq-túlik baǵasynyń orynsyz ósýine jol bermeý qajet. Saýda mınıstrligi ákimdiktermen birge baǵa saıasatyn retteý úshin qoldaǵy barlyq quraldy iske qosyp, bul máseleni qatań baqylaýǵa alýy kerek. Jalpy, Aýyl sharýashylyǵy mınıstrligi oblys ákimdikterimen birge egin oraǵynyń sapaly ótýin, onyń ishinde Úkimet janyndaǵy Jedel shtab aıasynda baqylaýdy qamtamasyz etsin, - dedi Oljas Bektenov.
Aıta keteıik, bıyl boljam boıynsha 24 mln tonna astyq bastyrylady.
Osy rette Premer-mınıstr astyqty egis alqabynan tıisti jerine deıin jetkizýdi joǵary deńgeıde uıymdastyrýdy tapsyrdy.