Egin jınaý naýqany barysynda 26,4 mln tonna astyq bastyryldy
ASTANA.KAZINFORM — Elimizde egin jınaý jumystary josparly túrde júrgizilip, naýqan óz máresine taıap qaldy. Bul týraly Aýyl sharýashylyǵy vıtse-mınıstri Azat Sultanov Ortalyq kommýnıkatsııalar qyzmetinde ótken baspasóz konferentsııasy barysynda málim etti.
Onyń aıtýynsha, bıyl jalpy egin jınaý alańy 23,6 mln gektardy quraǵan. Sonyń ishinde 16 mln gektardan astamy dándi jáne dándi-burshaqty daqyldarǵa tıesili.
— Egin jınaý naýqany der kezinde bastaldy. Sharýalar qajetti tehnıkamen, janar-jaǵarmaımen jáne qarjy resýrstarymen tolyq qamtyldy. Qazirgi tańda respýblıka boıynsha 15,8 mln gektar, ıaǵnı 98,4 paıyz dándi daqyldar jınalyp, ortasha ónimdilik 16,8 tsentner/gektardy qurady. Jalpy 26,4 mln tonna astyq bastyryldy. Osylaısha, buǵan deıin aıtylǵandaı, bıyl rekordtyq kólemde ónim alý kútilýde, — dedi vıtse-mınıstr.
Sultanovtyń dereginshe, bıdaı 12 mln gektardan astam alańnan (98,8 paıyz) jınalyp, shamamen 20 mln tonna astyq bastyrylǵan. Al arpa men suly boıynsha 4,2 mln tonna ónim alynǵan, bul da 99 paıyz kórsetkishke jetken.
— Sonymen qatar júgeri alqabynyń 127 myń gektary (72,8 paıyz) jınalyp, 830 myń tonna ónim bastyrylyp, egis alqaptaryn ártaraptandyrý jumystary aıasynda dándi-burshaqty jáne maıly daqyldarǵa erekshe kóńil bólindi. Bul baǵyttaǵy nátıjeler qazirdiń ózinde baıqalyp otyr 773 myń gektar burshaqty daqyldar (99 paıyz) orylyp, alǵash ret 1 mln tonna ónim jınaldy, — dedi ol.
Sondaı-aq maıly daqyldar boıynsha shamamen 4 mln tonna kóleminde rekordtyq ónim alý boljanyp otyr. Búgingi kúni 2,7 mln gektar nemese 68 paıyz alqap orylyp, 3,2 mln tonna maıly daqyl bastyrylǵan.
Aýyl sharýashylyǵy óniminiń ulǵaıýy sharýalardyń tabysyn arttyryp qana qoımaı, kelesi maýsymǵa aldyn ala daıyndalýǵa múmkindik beredi.
Sondaı-aq, respýblıka boıynsha 130 myń gektar kartop (99%) jınalyp, 2,9 mln tonna ónim alyndy. Kókónister 129 myń gektardan (99%) jınalyp, 3,9 mln tonna ónim bastyryldy. Al baqsha daqyldarynyń jınaý jumystary tolyq aıaqtalyp, 94 myń gektardan 2,6 mln tonna ónim alynǵan.
Baspasóz konferentsııasy barysynda jýrnalıster tarapynan aýyl sharýashylyǵy salasyna aýa raıynyń qolaısyzdyǵy men janarmaı baǵasynyń turaqsyzdyǵy qalaı áser etkeni jóninde suraq qoıyldy.
Aýyl sharýashylyǵy mınıstrligi Eginshilik departamentiniń dırektory Nazgúl Hatepova bul suraqqa jaýap bere otyryp, naýqan barysynda 422 myń tonna arzandatylǵan dızel otyny bólingenin aıtty.
— Bul ishki naryqtaǵy baǵadan 15 paıyzǵa arzan. Sonymen qatar klımattyq jaǵdaıǵa baılanysty maıly jáne astyq daqyldaryn keptirýge qosymsha 40 myń tonna dızel otyny Energetıka mınıstrligimen birlese bólindi. Qazirgi tańda ishki naryqta qosymsha otynǵa tapshylyq joq, — dedi Hatepova.
Onyń aıtýynsha, bıyl vegetatsııa kezeńinde aýa raıy qolaıly boldy, jaýyn-shashyn da jetkilikti mólsherde jaýǵan.
— Egin egý naýqany merziminen erte bastaldy. Zııankestermen kúres te júıeli júrgizildi. Vegetatsııa kezinde keıbir óńirlerde shegirtkemen baılanysty máseleler boldy. Degenmen, AShM ákimdiktermen birlese otyryp, ýaqytyly sharalar qabyldaýdyń arqasynda eginge aıtarlyqtaı zııan kelgen joq, — dedi departament basshysy.
Buǵan deıin Respýblıka aýmaǵynda egistik alqaptaryna, jaıylymdar men shabyndyqtarǵa shegirtkeden zııan kelmegenin jazǵanbyz.
Sonymen qatar SQO ázirge egin oraǵy aýa raıy men dızel sapasyna baılanysty aıaqtalmaı turǵanyn jazǵanbyz.