Egin jınaý naýqany aıaqtalýǵa jaqyn
ASTANA. KAZINFORM – Birqatar óńirde egin jınaý jumystary aıaqtalýǵa jaqyn. Bul týraly búgin Úkimet otyrysynda Aýyl sharýashylyǵy vıtse-mınıstri Azat Sultanov aıtty.
Onyń aıtýynsha, Batys Qazaqstan oblysynda egin jınaý jumystary tolyq aıaqtaldy. Al Shyǵys Qazaqstan, Pavlodar, Jambyl jáne Qaraǵandy oblystarynda astyqtyń 95%-dan astamy jınaldy.
- Qazirgi ýaqytta egin jınaý jumystarynyń basym bóligi negizgi astyq egetin óńirlerde júrgizilip jatyr. Jalpy, naýqan uıymdasqan túrde ótip, qazir aıaqtalý kezeńinde, – dedi Azat Sultanov.
Vıtse-mınıstrdiń málimetinshe, bıyl egin jınaý jumystaryna 130 myń traktor, 29 myń astyq jınaıtyn kombaın, 17 myń jatka jáne 130 myń birlik ózge de tehnıka jumyldyryldy. Onyń ishinde jeńildetilgen lızıng baǵdarlamasy aıasynda satyp alynǵan 12,7 myńnan astam traktor men 2,3 myń kombaın egin jınaý jumystaryna qatysyp jatyr. Bul qoldanystaǵy traktorlar men kombaındar parkiniń shamamen 10%-yn quraıdy.
- Tehnıka parkin jańartýǵa, eń aldymen, otandyq tehnıka óndirýshilerin qoldaýǵa baǵyttalǵan ınvestıtsııalyq sýbsıdııalaý túrindegi memlekettik qoldaý sharalary aıtarlyqtaı yqpal etti. Nátıjesinde tehnıka parkiniń tozý deńgeıi 70%-ǵa deıin tómendep, ony jańartý deńgeıi 6,5%-ǵa jetkizildi. Egin jınaý jumystaryn júrgizý úshin óńirlerge 401,1 myń tonna dızel otyny bólindi. Búgingi kúnge 268 myń tonnasy nemese bólingen kólemniń 67%-y jóneltildi. Sonymen qatar, egin jınaý kezeńindegi jaýyn-shashyndy eskere otyryp, astyqty keptirýge qosymsha 41,3 myń tonna dızel otyny bólindi, - dedi ol.
Buǵan deıin bıyl qýańshylyqqa qaramastan astyq túsimi kópjyldyq ortasha kórsetkishten joǵary bolatynyn jazǵan edik.
