Egin jınaý naýqany: 2,4 mln tonnaǵa jýyq astyq bastyryldy

ASTANA. KAZINFORM - Elimizdiń barlyq óńirlerinde egin jınaý jumystary júrgizilýde. Jappaı egin jınaý naýqany shamamen tamyzdyń úshinshi onkúndiginde bastalady.

23 tamyzda 1,3 mln gektarǵa jýyq dándi jáne burshaqty daqyldar jınaldy, ortasha ónimdiligi — 18,5 ts/ga. Qazirdiń ózinde 2,4 mln tonna astyq bastyryldy.

Kókónis daqyldary 51,9 myń gektardan jınaldy, ónimdiligi — 248 ts/ga, 1,3 mln tonnaǵa jýyq jınaldy. Baqsha daqyldary - 82,7 myń ga alqaptan jınaldy, ónimdiligi — 249,3 ts/ga, jalpy alym 2 mıllıon tonnadan asty.

Egin jınaý naýqanyna 149,9 myń traktor, 37,6 myń astyq jınaıtyn kombaın, 14,9 myń oraq jáne 195 myń birlik basqa tehnıka qatysady.

Aǵymdaǵy jyldyń egin jınaý jumystaryna dızel otynynyń kólemin qalyptastyrý aqparattyq júıe bazasynda aýyl sharýashylyǵy taýaryn óndirýshilerdiń elektrondyq ótinimderi negizinde júzege asyryldy. "Gosagro.kz" arqyly 355,0 myń tonna dızel otyny qabyldandy.

AShTÓ úshin dızel otynynyń quny lıtrine  250 teńge deńgeıinde, bul naryqtan 15% arzan. Agrarshylarǵa shamamen 54,5 myń tonna janarmaı jóneltildi.

Jalpy, kóktemgi egis jáne egin jınaý jumystaryn jeńildetilgen qarjylandyrý kólemi 580 mlrd teńgeni qurady, bul ótken jyldarmen salystyrǵanda 3 ese kóp.