Egin naýqanyna erte daıyndyq: sharýalar 1 qazanda nesıege ótinim bere alady
ASTANA. KAZINFORM – Qazaqstan sharýalary 2027 jylǵy kóktemgi dala jumystaryna qajetti qarjyny 1 qazannan bastap rásimdeı alady. Erte qarjylandyrý tehnıka, janar-jaǵarmaı, tyńaıtqysh pen ósimdikterdi qorǵaý quraldaryn maýsym bastalmaı turyp satyp alýǵa múmkindik beredi.
Aýyl sharýashylyǵy vıtse-mınıstri Nazgúl Hatepovanyń aıtýynsha, 2012 jyldaǵydaı tabıǵı-klımattyq jaǵdaılar bolǵanda elimiz boıynsha ortasha ónimdilik 9 tsentner deńgeıinde bolǵan. Al bıylǵy qýańshylyqta bul kórsetkish 14,7 tsentnerge jetken.
– Buǵan áser etken negizgi faktorlardyń biri – memleket tarapynan beriletin jeńildetilgen qarjylandyrý dep esepteımiz. Bıyl sharýalarǵa 1 trıllıon teńgeden astam jeńildetilgen nesıe berildi. Bul – sýbsıdııa emes, qaıtarymdy nesıe. Sharýalar osy 1 trıllıon teńgeni 15 aı ishinde memleketke qaıtarady. Jyl saıyn bul qarajat kóktemgi dala jumystaryn júrgizý úshin sharýalarǵa aldyn ala beriledi, – dedi Nazgúl Hatepova Úkimette ótken brıfıngte.
Endi 2027 jylǵy kóktemgi dala jumystaryna ótinimder 1 qazannan bastap qabyldanady. Erte qarjylandyrýdyń arqasynda sharýalar qajetti tehnıka, janar-jaǵarmaı, mıneraldy tyńaıtqyshtar men ósimdikterdi qorǵaý quraldaryn aldyn ala jáne tómen baǵamen satyp ala alady.
– Memlekettik qoldaý sharalarynyń arqasynda sharýalardyń agrotehnologııalardy saqtaý deńgeıi de artqanyn kórip otyrmyz. Mysaly, buryn jylyna 600-700 myń tonna mıneraldy tyńaıtqysh engizilse, qazirgi tańda bul kórsetkish 2,1 mln tonnaǵa jetti. Jalpy jyldyq engizý normasy – 3,2 mln tonna. ıAǵnı 2028 jylǵa deıin osy kórsetkishke tolyq jetýdi josparlap otyrmyz. Tuqym sapasy da jaqsardy. Ótken jyldyń qorytyndysy boıynsha jalpy tuqym kólemindegi elıtalyq tuqymdardyń úlesi 11,6% qurady. Agrotehnologııalardy saqtaý deńgeıiniń artýy nátıjesinde sońǵy úsh jylda ortasha ónimdiliktiń turaqty ósip kele jatqanyn kórip otyrmyz, – dedi Aýyl sharýashylyǵy vıtse-mınıstri.
Buǵan deıin Nazgúl Hatepova Qazaqstanda óndirilgen kókónister qalaı saqtalatynyn aıtyp bergen edi.
Sondaı-aq elde ettiń kúrt qymbattaýyna negiz joq.
