Egizderin tunshyqtyryp óltirgen ata-ana sottan jazasyn jeńildetýdi surady
ALMATY. QazAqparat - Almaty qalalyq sotynyń apellıatsııalyq kollegııasynda egiz uldaryn tunshyqtyryp óltirgen erli-zaıyptynyń isi boıynsha ótinish qaraldy, dep habarlaıdy QazAqparat tilshisi.
Emıl Gılmýtdınov pen Alla Volchenko sottan jazasyn jeńildetýdi suraǵan.
Sottalýshylardyń qorǵaýshysy Amangeldi Sarıev aldyńǵy sot úkimin qaıta qaraýǵa ótinish bildirgen. Onyń aıtýynsha, kúdiktiler óz kinálaryn tolyq moınyna alǵan.
«Olar aldyn ala adam óltirý týraly ýaǵdalasqan joq. Ol (Emıl) bárin ózi istegen. Balalardy óltirip jatqan kezde ol ishimdikke mas bolǵan. Onyń aldynda 3-4 aı qatarynan ishken. Keıin ekeýi de Túrksib aýdandyq ІІB-ne jasaǵanyn moıyndap barǵan, istegenderine ókingen. Sondyqtan, osy máseleniń barlyǵyn úkim shyǵaratyn kezde eskerýińizdi suraımyn», - dedi advokat Sarıev.
Volchenkonyń qorǵaýshysy Farhad Taıpov ta áıeldiń balany óltirý týraly múlde oılamaǵanyn, bilmegenin alǵa tartty.
Eske sala ketsek, 11 qyrkúıek kúni jantúrshigerlik oqıǵa Túriksib aýdanynda bolǵan. Kóppáterli úılerdiń birinde tońazytqyshtyń ishinen sábılerdiń múrdesi tabylǵan. Sol kúni Medeý aýdanynda adasyp júrgen eki jastaǵy er bala polıtsııaǵa jetkizildi. Bala ólgen egizderdiń aǵasy ekeni anyqtaldy. Egizderdiń ólimine kúdikti retinde olardyń ata-anasy ustaldy.
Almaty aýdanaralyq qylmystyq ister boıynsha sotynyń sýdıasy Qazaqstan azamatshasy Alla Volchenkony 18 jylǵa, onyń azamattyq nekedegi kúıeýi Ózbekstan azamaty Emıl Gılmýtdınovty 20 jylǵa bas bostandyǵynan aıyrý týraly úkim shyǵarǵan bolatyn.
Alaıda, apellıatsııalyq kollegııa aldyǵy sot úkimi ózgerissiz qaldyrdy.
